| 章節 | 台語漢字本聖經 請按此下載安裝Open Han 2024版字型，免得漏掉造字 |
| 11:1 | 耶路撒冷受判罪 神就舉起我，帶我到耶和華的厝向東的東門。看啊，佇門的門口有二十五人，我看見𪜶中間有百姓的貴族，押朔的子雅撒尼及比拿雅的子毗拉提。 |
| 11:2 | 伊給我講：「人子啊，這就是圖謀罪惡的人，提倡歹代佇此個城內。 |
| 11:3 | 𪜶講：『起厝的期猶未到；此個城是鼎，阮是彼內面的肉。』 |
| 11:4 | 人子啊，因為按呢你著宣傳，著宣傳來攻擊𪜶。」 |
| 11:5 | 耶和華的神臨到我，對我講：「你著講，耶和華按呢講：以色列家啊，恁講按呢，恁的心所想，我知啦。 |
| 11:6 | 恁佇此個城內刣死多多人，互身屍滿街路。 |
| 11:7 | 所以主耶和華按呢講：恁所下佇此個城內的死人就是肉，此個城就是鼎；總是恁欲對彼中間受帶出去。 |
| 11:8 | 恁驚刀劍，我欲互刀劍臨到恁。這是主耶和華講的。 |
| 11:9 | 我欲對彼中間導恁出去，交佇外邦人的手，閣欲佇恁中間行審判。 |
| 11:10 | 恁欲倒佇刀下；我欲佇以色列的交界審判恁，恁就知我是耶和華。 |
| 11:11 | 此個城無欲做恁的鼎，恁亦無欲做彼中間的肉。我欲佇以色列的交界審判恁， |
| 11:12 | 恁就知我是耶和華；因為恁無行我的律例，亦無順趁我的法度，就是趁恁四圍列國的法度。」 |
| 11:13 | 我抵仔啲宣傳的時，比拿雅的子毗拉提死去。我就仆佇地裡，大聲叫講：「嗐啊！主耶和華啊，你欲將以色列的人一盡剿滅嗎？」 |
| 11:14 | 上帝對分散佇列國中的人的應允 耶和華的話臨到我講： |
| 11:15 | 「人子啊，耶路撒冷徛起的百姓，對你的兄弟就是你的兄弟、你的親人，及以色列全家，就是對眾人講：『恁著離開耶和華！因為此個地是互阮做業的。』 |
| 11:16 | 所以你著講：『主耶和華按呢講：我雖然遷徙𪜶遠遠佇列邦中，四散𪜶佇列國中，我猶欲佇𪜶所到的國，暫時做𪜶的聖所。』 |
| 11:17 | 所以你著講：『主耶和華按呢講：我欲對諸個百姓中招集恁，亦欲對恁四散到的列國中聚集恁，閣欲將以色列地賞賜恁。』 |
| 11:18 | 𪜶欲到遐，亦欲對𪜶中間除去一切可惡通怨恨的物。 |
| 11:19 | 我欲互𪜶專一的心，亦欲將新的神下佇恁的內面，閣欲對𪜶的肉體中除去彼號親像石的心，賞賜𪜶彼號親像肉的心， |
| 11:20 | 互𪜶順趁我的律例，遵守我的法度來行伊。𪜶做我的百姓，我亦欲做𪜶的上帝。 |
| 11:21 | 總是心趁可惡通厭賤者的心彼號人，我欲照𪜶所行的報應佇𪜶的頭殼頂。這是主耶和華講的。」 |
| 11:22 | 上帝的榮耀離開耶路撒冷 彼時，𠼻𡀔兵展開𪜶的翅，許個輪亦佇𪜶的邊頭；佇𪜶的頂面有以色列上帝的榮光。 |
| 11:23 | 耶和華的榮光對城中上去，歇佇城外東勢的山。 |
| 11:24 | 神舉起我，佇異象中對上帝的神帶我到迦勒底受掠的人遐；我所看見的異象就離開我上去。 |
| 11:25 | 我就將耶和華所指示我一切的事，攏講互受掠的人聽。 |