| 章節 | 台語漢字本聖經 請按此下載安裝Open Han 2024版字型，免得漏掉造字 |
| 7:1 | 以色列的結局近了 耶和華的話閣臨到我講： |
| 7:2 | 「人子啊，主耶和華對以色列地按呢講：結局到啦！此個地的四境結局到啦！ |
| 7:3 | 今你的結局已經到啦，我欲互我的受氣到佇你，亦欲照你的所行審判你，照你一切可惡的事報應你。 |
| 7:4 | 我的目睭無欲保惜你，我亦無欲可憐你，是欲照你的所行報應你，你可惡的事欲歸佇你中間。恁就知我是耶和華。 |
| 7:5 | 「主耶和華按呢講：有災禍，非常的災禍；看啊，欲到啦！ |
| 7:6 | 結局到啦！結局到啦！起來攻擊你。看啊，到啦！ |
| 7:7 | 境內徛起的百姓啊，所定著的災禍欲臨到你，時期到啦，日子近啦，就是嘩嘩嚷，是山頂歡喜的聲的日。 |
| 7:8 | 我欲緊緊傾出我的大受氣佇你，閣一盡成我的受氣佇你，照你的所行審判你，照你一切可惡的事報應你。 |
| 7:9 | 我的目睭無欲保惜你，我亦無欲可憐你，欲照你的所行報應你，你可惡的事欲歸佇你中間。恁就知拍恁者是我耶和華。 |
| 7:10 | 「看啊，看啊，日子已經到啦，所定著的災禍已經發出。枴仔已經開花，驕傲已經發芽。 |
| 7:11 | 強暴興起，成做刑罰歹的枴仔。𪜶無去，𪜶眾人亦無去，𪜶的財寶也無去，𪜶中間無人得著尊貴。 |
| 7:12 | 時期到啦，日子近啦，買的人莫得歡喜，賣的人莫得煩惱，因為大受氣已經到佇𪜶眾人。 |
| 7:13 | 賣者𪜶雖然猶活啲，也𣍐倒轉到伊所賣者，因為此個異象關係𪜶眾人。攏𣍐倒轉來，亦無人會對伊的歹所行來堅固伊的活命。」 |
| 7:14 | 刑罰以色列的罪惡 「𪜶已經歕哨角，備辦齊備，總是無人出去交戰，因為我的大受氣臨到𪜶眾人。 |
| 7:15 | 佇外面有刀劍，佇內面有瘟疫、有飢荒；佇田野者，欲對刀劍來死；佇城內者，飢荒及瘟疫欲吞滅伊。 |
| 7:16 | 其中脫離者欲脫離，逐人因為伊的罪過佇山裡出悲哀的聲，親像山谷中的鳩鵻。 |
| 7:17 | 手攏酸，腳頭窩軟親像水。 |
| 7:18 | 欲用麻布縖腰，驚惶欲遮蓋伊；逐人面見誚，頭殼無半支毛。 |
| 7:19 | 𪜶欲㧒𪜶的銀佇街路，看金親像污穢的物。當耶和華受氣的日，𪜶的金銀𣍐會救𪜶，𣍐會互𪜶的心知足，亦𣍐會互𪜶的腹肚飽，因為這有絆倒𪜶佇罪惡中。 |
| 7:20 | 論到伊妝飾的媠，是伊互伊得著威風，𪜶就用伊來妝通怨恨的物，通厭賤的偶像，所以我互𪜶看親像污穢的物。 |
| 7:21 | 我欲將伊交佇外邦人的手，做伊所搶的物，交付地上的歹人做賊贓；𪜶亦欲拍垃墋伊。 |
| 7:22 | 我欲越轉我的面無看𪜶，𪜶欲拍垃墋我機密的所在，強猛的賊也欲入去拍垃墋。 |
| 7:23 | 「著造鐵鍊；因為此所在滿滿流血的罪，城內充滿強暴的事， |
| 7:24 | 我欲互外邦第一歹者來霸佔𪜶的厝宅；我欲互強暴的人的驕傲息，𪜶的聖所拍垃墋。 |
| 7:25 | 毀滅近啦，𪜶欲求平安，亦𣍐得著。 |
| 7:26 | 欲有災禍加添災禍，風聲續接風聲；𪜶欲對先知求異象，總是祭司的律法，長老的計劃攏欲斷絕。 |
| 7:27 | 國王欲悲哀，王親欲冷靜，百姓的手愕愕惙。我欲照𪜶的所行款待𪜶，照𪜶應該受的審判，來審判𪜶，𪜶就知我是耶和華。」 |