| 章節 | 台語漢字本聖經 請按此下載安裝Open Han 2024版字型，免得漏掉造字 |
| 4:1 | 表演耶路撒冷受困 「人子啊，你著提一塊磚，下佇你的面前，畫耶路撒冷城佇彼頂面， |
| 4:2 | 閣圍困攻擊伊，起土堆攻擊伊，佇四圍安設大錘攻擊伊， |
| 4:3 | 閣著提鐵板，下佇你及城的中間，準做鐵牆。你的面定定向伊，就城受圍困，你欲圍困伊；這通做兆頭佇以色列家。 |
| 4:4 | 「你著敧倒旁倒啲，擔當以色列家的罪；照你敧倒旁倒啲的日偌多，你擔當𪜶的罪也是按呢。 |
| 4:5 | 我將𪜶犯罪的年互你用日的數額來抵伊，就是三百九十日，你照按呢擔當以色列家的罪過。 |
| 4:6 | 你已經滿諸個日，著閣敧正旁倒啲，擔當猶大家的罪過。我給你限四十日，一日抵一年。 |
| 4:7 | 所以你的面著定定向受圍困的耶路撒冷，手骨露裼裼，宣傳來攻擊伊。 |
| 4:8 | 看啊，我欲用索下佇你的身上，致到你𣍐會翻過旁，到你圍困城的日滿。 |
| 4:9 | 「你著提小麥、大麥、豆仔、紅豆、黍仔、及粗麥，貯佇一個器具內，為著本身用伊來做餅；照你倒坦敧的日的數額，就是三百九十日你著食伊。 |
| 4:10 | 你所食的食物著照秤重，逐日食二十舍客勒，照時來食。 |
| 4:11 | 你飲水亦著照量，逐日一欣的六份一，照時來飲。 |
| 4:12 | 你食此個餅親像食大麥餅一樣，著用人所放的糞，煏伊佇眾人的目睭前。」 |
| 4:13 | 耶和華講：「以色列人佇我所趕𪜶到的列國中，亦的確按呢食無清氣的餅。」 |
| 4:14 | 我講：「唉啊！主耶和華啊，我平素未曾染著垃墋，對細漢到今未曾食家己死者，抑是互野獸拆裂者，彼個可惡的肉亦未曾入我的嘴。」 |
| 4:15 | 對按呢伊對我講：「看啊，我互你用牛屎來替人的糞，你著將你的餅煏佇彼頂面。」 |
| 4:16 | 伊閣對我講：「人子啊，看啊，我欲佇耶路撒冷斷絕𪜶所倚靠的米糧。𪜶食餅著照秤，撙節來食；飲水亦著照量，卬愕來飲； |
| 4:17 | 互𪜶欠缺餅及水，相及卬愕，閣佇𪜶的罪過來消滅。」 |