| 章節 | 台語漢字本聖經 請按此下載安裝Open Han 2024版字型，免得漏掉造字 |
| 41:1 | 七月間，以利沙瑪的孫、尼探雅的子以實瑪利，伊是王親亦是王的大臣，導十人來米斯巴見亞希甘的子基大利。𪜶佇米斯巴相及食。 |
| 41:2 | 尼探雅的子以實瑪利以及及伊來的彼十人起來，用刀刣死沙番的孫亞希甘的子基大利，就是巴比倫王所立來管轄此個地者。 |
| 41:3 | 以實瑪利閣刣死佇米斯巴歸倚基大利攏總的猶大人，以及佇遐所抵著迦勒底的軍兵。 |
| 41:4 | 伊刣死基大利了後，第二日，猶無人知。 |
| 41:5 | 彼霎，有八十人對示劍、對示羅，對撒瑪利亞來，剃嘴鬚，拆裂衫，家己割身軀，手提禮物及乳香，欲帶伊到耶和華的厝。 |
| 41:6 | 尼探雅的子以實瑪利對米斯巴出來迎接𪜶，愈行愈哭；到抵著𪜶，就給𪜶講：「恁來去見亞希甘的子基大利。」 |
| 41:7 | 𪜶到城中，尼探雅的子以實瑪利及隨伊的人，就刣死𪜶，㧒𪜶佇乾井。 |
| 41:8 | 𪜶中間有十人對以實瑪利講：「莫得刣死阮，因為阮有多多小麥、大麥、油、蜜、囥佇田裡。」伊就停手，無刣𪜶佇𪜶的兄弟中。 |
| 41:9 | 以實瑪利刣諸個人倚近基大利遐，將𪜶的身屍㧒佇井裡；此個井是從前亞撒王因為驚以色列王巴沙的緣故所開的。尼探雅的子以實瑪利將所刣的身屍填滿伊。 |
| 41:10 | 以實瑪利掠米斯巴所剩的百姓，就是王的眾查某子以及猶住佇米斯巴的百姓，就是侍衛長尼布撒拉旦所交代亞希甘的子基大利者。尼探雅的子以實瑪利掠伊去，欲過去亞捫族遐。 |
| 41:11 | 加利亞的子約哈難以及及伊佇啲的眾軍長，聽見尼探雅的子以實瑪利所行一切的歹， |
| 41:12 | 就導眾人進前去，欲及尼探雅的子以實瑪利交戰，佇基遍的大水邊尋著的。 |
| 41:13 | 以實瑪利所帶去許個百姓看見加利亞的子約哈難以及及伊來的眾軍長，就攏歡喜。 |
| 41:14 | 對按呢，以實瑪利對米斯巴所掠去的眾百姓攏越轉來歸加利亞的子約哈難。 |
| 41:15 | 尼探雅的子以實瑪利及八個人脫離約哈難的手，走去亞捫族遐。 |
| 41:16 | 後來加利亞的子約哈難及隨伊的眾軍長將所剩的百姓，就是尼探雅的子以實瑪利拍死亞希甘的子基大利以後，對米斯巴所帶去的查甫人、勇士、婦女、囝仔，太監，閣是伊對基遍帶來的， |
| 41:17 | 𪜶就起身到伯利恆邊仔金罕的客店停歇，想欲去埃及； |
| 41:18 | 這是因為迦勒底人的緣故，因為尼探雅的子以實瑪利有刣死亞希甘的子基大利，就是巴比倫王所立來管轄此個土地者，所以𪜶驚。 |