| 章節 | 台語漢字本聖經 請按此下載安裝Open Han 2024版字型，免得漏掉造字 |
| 30:1 | 耶和華應允伊的百姓 耶和華的話臨到耶利米講： |
| 30:2 | 「以色列的上帝──耶和華按呢講：見若我所曾給你講的話攏著寫佇冊裡。 |
| 30:3 | 耶和華講：看啊，日子欲到，我欲互我的百姓以色列及猶大受掠的人倒轉來；我亦欲互𪜶倒來我所賞賜𪜶的列祖的地，𪜶就得著此個地做業。這是耶和華講的。」
|
| 30:4 | 耶和華論到以色列及猶大的話記佇下底：
|
| 30:5 | 耶和華按呢講：阮有聽見，
愕愕惙驚惶無平安的聲。 |
| 30:6 | 今恁著去問看，
有查甫人生子無？ 怎樣我看見人人用手扼腰， 親像欲生子的婦仁人， 面攏變青？ |
| 30:7 | 慘啊！彼個日是大，
無通比並； 是雅各抵著患難的期日， 總是伊欲得著救來脫出。 |
| 30:8 | 萬軍的耶和華按呢講：「到彼日，我欲對你的頷頸遏折伊的軛，掇斷縛你的索；外邦人無閣用伊做差用。 |
| 30:9 | 𪜶是欲服事𪜶的上帝──耶和華，及𪜶的王大衛，就是我欲給𪜶興起者。」
|
| 30:10 | 耶和華講：
我的奴僕雅各啊，按呢你莫得驚； 以色列啊，莫得驚惶； 因為我欲對遠的所在拯救你， 亦欲對受掠去的地拯救你的後裔， 雅各欲倒來得著安靜，平安， 無人互伊驚。 |
| 30:11 | 因為我及你佇啲，來拯救你，
亦欲將我所趕你到許個國一盡剿滅， 總是無一盡剿滅你，欲照所合宜的責備你， 斷斷𣍐會無刑罰你。 這是耶和華講的。 |
| 30:12 | 耶和華按呢講：
你的傷𣍐醫得； 你的傷痕真傷重。 |
| 30:13 | 無人替你辯護，
互你的傷痕得著包； 你無醫治的好藥。 |
| 30:14 | 疼你的人攏𣍐記得你，
無來探你。 因為你的罪過真重，罪惡真多， 我用對敵彼款的拍來拍你， 亦用殘忍者的警戒，來警戒你。 |
| 30:15 | 你啥事因為你的傷來喉叫啊？
你的痛苦𣍐醫得。 因為你的罪過真重，罪惡真多， 我所以用諸個款待你。 |
| 30:16 | 所以，見若吞食你的欲受吞食；
你的對敵一個一個攏互人掠去； 搶你的欲互人搶； 劫你的我欲互伊受劫。 |
| 30:17 | 耶和華講：我欲互你的身體復原，
醫好你的傷痕， 因為人攏稱你做受趕逐者， 講：這是錫安，無人尋見者！ |
| 30:18 | 耶和華按呢講：
看啊，我欲互雅各受遷徙的布棚倒轉來， 亦欲可憐伊徛起的所在。 城欲起佇原舊的牆基； 王宮亦照舊有人徛起。 |
| 30:19 | 欲有感謝及快樂者的聲對𪜶中間出來，
我也欲互𪜶加添多多，不致減少； 互𪜶尊貴，不致卑微。 |
| 30:20 | 𪜶的子兒欲親像早日；
𪜶的會眾欲徛在佇我的面前； 凡若壓制𪜶者，我欲辦伊。 |
| 30:21 | 𪜶的君王的確是屬佇𪜶者；
掌管𪜶者欲對𪜶中間出。 我欲互伊近倚， 伊亦欲親近我； 若是按呢，是誰敢好膽親近我？ 這是耶和華講的。 |
| 30:22 | 恁欲做我的百姓，
我欲做恁的上帝。 |
| 30:23 | 看啊，耶和華的受氣
親像大風發出； 就是掃滅的大風， 欲轉踅攻擊歹人的頭殼。 |
| 30:24 | 耶和華的心所擬定的猶未做，
猶未成的代先，伊的大受氣的確無收倒轉； 日後恁欲明白。 |