| 章節 | 台語漢字本聖經 請按此下載安裝Open Han 2024版字型，免得漏掉造字 |
| 28:1 | 耶利米及先知哈拿尼雅 當彼年，猶大王西底家起頭坐位的第四年五月，基遍人押朔的子，先知哈拿尼雅，佇耶和華的厝當諸個祭司及眾百姓的面前對我講： |
| 28:2 | 「萬軍的耶和華──以色列的上帝按呢講：我已經遏折巴比倫王的軛。 |
| 28:3 | 二年內，我欲將巴比倫王尼布甲尼撒對此所在搶去到巴比倫，就是耶和華的厝一切的器具攏欲互伊倒轉來此所在。 |
| 28:4 | 我閣欲將猶大王約雅敬的子耶哥尼雅及受掠到巴比倫許個猶大人，互𪜶倒轉來此所在，因為我欲遏折巴比倫王的軛。這是耶和華講的。」 |
| 28:5 | 彼時，先知耶利米當諸個祭司的面前及徛佇耶和華的厝眾百姓的面前對先知哈拿尼雅講： |
| 28:6 | 「先知耶利米講，阿們！願耶和華按呢行，願耶和華成你所讖語諸個話，將耶和華厝內的器具及一切受掠去的人對巴比倫倒來此所在。 |
| 28:7 | 總是我對你及眾百姓所講的話，你著聽。 |
| 28:8 | 對古早以來，你我以前許個先知，對多多所在及大國讖語，交戰、災禍、瘟疫。 |
| 28:9 | 先知讖語平安，彼個先知的話得著應驗，就知彼個先知真正是耶和華所差者。」 |
| 28:10 | 對按呢，先知哈拿尼雅將先知耶利米頷頸的軛提起來，給伊遏折。 |
| 28:11 | 哈拿尼雅閣當眾百姓的面前講：「耶和華按呢講：二年內我欲照按呢對列國的頷頸遏折巴比倫王尼布甲尼撒的軛。」先知耶利米就做伊去。 |
| 28:12 | 先知哈拿尼雅將先知耶利米頷頸的軛遏折了後，耶和華的話臨到耶利米講： |
| 28:13 | 「你著去給哈拿尼雅講，耶和華按呢講：你遏折柴的軛，欲做鐵的軛來替𪜶！ |
| 28:14 | 因為萬軍的耶和華──以色列的上帝按呢講：我將鐵的軛掛佇列邦的頷頸，互𪜶服事巴比倫王尼布甲尼撒，𪜶攏欲服事伊；我亦將田野的走獸互伊。」 |
| 28:15 | 先知耶利米就對先知哈拿尼雅講：「哈拿尼雅啊，你著聽！耶和華並無差你，你竟然互此個百姓倚靠白賊。 |
| 28:16 | 所以耶和華按呢講：你看，我欲互你離開世間，你今年的確死，因為你講悖逆耶和華的話。」 |
| 28:17 | 彼年七月先知哈拿尼雅就死。 |