| 章節 | 台語漢字本聖經 請按此下載安裝Open Han 2024版字型，免得漏掉造字 |
| 23:1 | 對將來的希望 耶和華講：「牧者殘害我的草場的羊，互伊四散，𪜶有災禍啊！」 |
| 23:2 | 所以以色列的上帝──耶和華責備許個養飼我的百姓的牧者，按呢講：「恁拍散我的羊群，來趕𪜶去，無看顧𪜶；看啊，我欲照恁所行的歹來辦恁。這是耶和華講的。 |
| 23:3 | 我欲聚集我的羊群所剩的，對我所趕𪜶到的逐國，導𪜶閣倒來𪜶的；互𪜶生湠多多。 |
| 23:4 | 我欲設立牧者治理𪜶，養飼𪜶。互𪜶無閣驚惶、卬愕，亦無減少；這是耶和華講的。」 |
| 23:5 | 耶和華講：「日子欲到，我欲給大衛興起義的枝；伊欲做王來治理，行代誌有智慧，佇地上行公平及公義。 |
| 23:6 | 當伊的日，猶大欲得著救，以色列欲安然徛起。伊的名欲稱做『耶和華──咱的義』。」 |
| 23:7 | 耶和華講：「看啊，日子欲到，人指耶和華的永活來咒誓，無欲講伊是導以色列的後裔對埃及地上來者， |
| 23:8 | 𪜶指耶和華的永活來咒誓，是欲講伊帶以色列的後裔導𪜶對北方的地，亦對見若我所趕𪜶到的地上來。𪜶欲徛起佇本所在。」 |
| 23:9 | 對先知的警告 論到許個先知， 我的心佇我的內面憂傷， 我的骨攏栗栗惙； 為著耶和華及伊聖的話， 我親像酒醉的人， 親像互酒所卡贏的人。 |
| 23:10 | 因為地方滿滿行淫亂的人！
閣因為抵著咒詛，地就悲哀； 曠野的草場攏枯焦。 𪜶所行的路就是歹； 𪜶的勢力無正直。 |
| 23:11 | 連先知及祭司都是褻瀆者，
就佇我的厝內我亦看見𪜶的歹。 這是耶和華講的。 |
| 23:12 | 因為按呢，𪜶的路欲親像黑暗中滑滑的地，
𪜶欲抵著趕逐，佇遐跋倒； 當辦理𪜶的年， 我欲互災禍到佇𪜶。 這是耶和華講的。 |
| 23:13 | 佇撒瑪利亞的先知，我已經看見𪜶的愚戇；
𪜶託巴力來讖語， 互我的百姓以色列行差路。 |
| 23:14 | 佇耶路撒冷的先知，我已經看見可惡的事；
𪜶行姦淫，做事白賊， 閣助歹人的手愈有力， 致到無人回頭離開伊的歹。 𪜶佇我的面前攏親像所多瑪； 徛起佇遐的百姓攏親像蛾摩拉。 |
| 23:15 | 所以萬軍的耶和華論到諸個先知有按呢講：
看啊，我欲用茵蔯互𪜶食， 閣用苦的水互𪜶飲； 因為褻瀆的事出佇耶路撒冷的先知，流行遍地。 |
| 23:16 | 萬軍的耶和華按呢講：「諸個先知對恁讖語的，恁莫得聽𪜶的話。𪜶用虛假教示恁，所講的異象是出佇𪜶的心，是出佇耶和華的嘴。 |
| 23:17 | 𪜶常常對藐視我的人講：『耶和華講：恁欲享受平安』；閣對一切照𪜶心的剛硬來行的人講：『的確無有災禍臨到恁。』」
|
| 23:18 | 是誰及耶和華契合，
得著聽伊的話來曉悟啊？ 是誰注意聽伊的話啊？ |
| 23:19 | 看啊！耶和華的受氣，
親像大風發出； 就是真透的捲螺風， 欲轉踅來攻擊歹人的頭殼。 |
| 23:20 | 耶和華的心所擬定的，猶未做，猶未成，
伊的受氣的確無倒轉， 日後恁欲明白透徹。 |
| 23:21 | 許個先知我無差𪜶，
𪜶家己走； 我無對𪜶講， 𪜶家己宣傳。 |
| 23:22 | 𪜶若及我契合，
就的確互我的百姓聽我的話， 互𪜶回頭離開𪜶的歹路及𪜶所行的歹。 |
| 23:23 | 耶和華講：「我豈做近的上帝？無做遠的上帝嗎？」 |
| 23:24 | 耶和華講：「人豈會匿佇隱密的所在，互我看伊𣍐著嗎？」耶和華講：「我豈無充滿佇天地嗎？ |
| 23:25 | 我已經聽見許個先知所講的，就是託我的名宣傳白賊，𪜶講：『我有夢見！我有夢見！』 |
| 23:26 | 宣傳白賊的先知，就是宣傳𪜶的心的詭詐，𪜶存此號的心欲到底時啊？ |
| 23:27 | 𪜶逐人將所夢的相及講起，想欲互我的百姓𣍐記得我的名，親像𪜶的列祖因為巴力來𣍐記得我的名一樣。 |
| 23:28 | 先知若有夢見通講起伊的夢；得著我的話者，著用誠實傳我的話。粗糠及麥豈會比得？這是耶和華講的。」 |
| 23:29 | 耶和華講：「我的話豈是親像火，閣親像會拍破石磐的大鎚嗎？ |
| 23:30 | 耶和華講：「看啊，許個先知對伊的同伴偷提我的話者，我攻擊𪜶。」 |
| 23:31 | 耶和華講：「許個先知用嘴舌講，這是耶和華講的；我攻擊𪜶。」 |
| 23:32 | 耶和華講：「看啊，許個用假的夢來做先知的，𪜶講起𪜶的夢，亦用𪜶的白賊及𪜶的謊譀，互我的百姓行差路，我攻擊𪜶。因為我無差𪜶，亦無命令𪜶，𪜶攏無利益此個百姓。這是耶和華講的。」 |
| 23:33 | 耶和華的重擔 「若此個百姓，抑是先知，抑是祭司，問你講：『耶和華有甚麼重擔的默示？』你就著給𪜶講：『甚麼重擔的默示啊？耶和華講：我欲棄拺恁就是。』 |
| 23:34 | 見若先知，抑是祭司，抑是百姓，講『耶和華重擔的默示者』，彼號人我欲刑罰伊及伊的家。 |
| 23:35 | 恁逐人對伊的厝邊，逐人對伊的兄弟著按呢講：『耶和華有應甚麼？』『耶和華有講甚麼？』 |
| 23:36 | 『耶和華重擔的默示』此句恁通閣講，因為逐人所講的話欲做𪜶本身的重擔，因為恁將永活的上帝、萬軍的耶和華──咱的上帝的話解互伊斜去。 |
| 23:37 | 你著對先知按呢講：『耶和華應你甚麼？』『耶和華講甚麼？』 |
| 23:38 | 恁若講『耶和華重擔的默示』，耶和華就按呢講：『我差人到恁遐給恁講，通講「耶和華重擔的默示」，恁猶啲講此句「耶和華重擔的默示」。』 |
| 23:39 | 所以我欲全然𣍐記得恁，將恁及我所賞賜恁以及恁的列祖的城，對我的面前棄拺； |
| 23:40 | 閣欲互永遠的凌辱及久長的見誚臨到恁，久長無𣍐記得。」 |