| 章節 | 台語漢字本聖經 請按此下載安裝Open Han 2024版字型，免得漏掉造字 |
| 19:1 | 破碎的瓶 耶和華按呢講：「你去買燒磁人的磁瓶，閣導百姓的老大及祭司中的老大， |
| 19:2 | 出去便欣嫩的山谷，哈珥西的門口遐，宣佈我所吩咐你的話， |
| 19:3 | 講：『猶大的列王及耶路撒冷徛起的百姓啊，著聽耶和華的話。萬軍的耶和華──以色列的上帝按呢講：看啊，我欲互災禍，臨到此個地方，凡若聽的人𪜶的耳孔的確抖； |
| 19:4 | 因為𪜶棄拺我，看此個所在親像外邦，閣佇遮燒香互別個上帝，就是𪜶前所識的，𪜶的列祖，以及猶大列王也是按呢，閣互無罪的人的血遍滿此個地方， |
| 19:5 | 閣為巴力起山頭的壇，通佇火中燒𪜶的子，做燒祭來獻互巴力。這是我所命令的，是我所提起的，亦是我的心所想的。 |
| 19:6 | 耶和華講：因為按呢，日子欲到，此個地方無閣稱做陀斐特及便欣嫩的山谷，反轉稱做殺戮的山谷。 |
| 19:7 | 我欲佇此個地方互猶大及耶路撒冷的計謀歸佇空空，亦欲互𪜶佇對敵的面前倒佇刀下，及數想𪜶的生命的人的手頭。𪜶的身屍，我欲互空中的飛鳥及地上的野獸做食物。 |
| 19:8 | 我欲互此個城做通卬愕通恥笑的；凡若經過的人，欲因為此個城所抵著的災禍來卬愕恥笑。 |
| 19:9 | 我欲互𪜶佇圍困窘迫的中間，就是對敵及數想𪜶的生命的人窘迫𪜶的時，逐人食𪜶的子的肉，查某子的肉，及朋友的肉。』 |
| 19:10 | 「講息，你著摔破彼個磁瓶互同行的人親目看見， |
| 19:11 | 續給𪜶講：『萬軍的耶和華按呢講：我欲按呢拍破此個城及此個百姓，親像人摔破燒磁人的磁器，𣍐閣補得。閣人欲佇陀斐特埋葬死人，到無剩所在。 |
| 19:12 | 耶和華講：我欲按呢款待此個所在，及其中徛起的百姓，互此個城親像陀斐特一樣。 |
| 19:13 | 耶路撒冷的厝及猶大列王的厝已經拍垃墋的，攏欲親像陀斐特，因為佇許個厝頂，人向天頂的萬象燒香、向別號的上帝灌奠。』」 |
| 19:14 | 耶利米對陀斐特──就是耶和華差伊去傳命令的地方──倒來，徛佇耶和華的厝的院內，對眾人講： |
| 19:15 | 「萬軍的耶和華──以色列的上帝按呢講：看啊，我欲互我所講一切刑罰𪜶的災禍到此個城及攏總屬伊的城，因為𪜶硬𪜶的頷頸肯聽我的話。」 |