| 章節 | 台語漢字本聖經 請按此下載安裝Open Han 2024版字型，免得漏掉造字 |
| 15:1 | 猶太百姓的歹運 耶和華對我講：「雖然有摩西及撒母耳徛佇我的面前替𪜶求，我的心亦無眷顧此個百姓。著趕𪜶離開我的面前，互𪜶出去！ |
| 15:2 | 𪜶若對你講：『阮著出去叨落。』你著給𪜶講，耶和華按呢講：
該死者，著死； 該互刀刣者，著互刀刣， 該抵著飢荒者，著扺著飢荒； 該互人掠者，著互人掠。」 |
| 15:3 | 耶和華閣講：「我調拴四項來辦𪜶，就是刀來刣𪜶、狗來拖𪜶、空中的鳥、地上的野獸食來滅𪜶； |
| 15:4 | 閣欲互𪜶流落佇天下萬國中，攏是因為猶大王希西家的子瑪拿西佇耶路撒冷所行的事。」
|
| 15:5 | 耶路撒冷啊，是誰可憐你啊？
是誰為你悲傷啊？ 是誰越轉身問你平安無？ |
| 15:6 | 耶和華講：你棄絕我，
越轉身退後； 因為按呢，我伸手攻擊你，毀壞你。 我憐憫你到厭。 |
| 15:7 | 我佇境內逐個城門口，
用簸箕簸𪜶， 我絕𪜶的後嗣。 我滅我的百姓， 𪜶猶原無越轉離開𪜶的路。 |
| 15:8 | 𪜶的寡婦加添佇我的面前，比海沙卡多；
我互殘害的中晝來， 攻擊少年人的老母， 互痛苦驚惶忽然到伊的身上。 |
| 15:9 | 生七個子的婦仁人衰膦氣斷；
當頭白日，伊的日頭忽然落； 伊漏氣見誚。 所剩的百姓， 我欲佇𪜶的對敵的面前，交互刀劍。 這是耶和華講的。 |
| 15:10 | 耶利米向耶和華訴苦 我的老母啊，我有災禍！因為你生我做一個及全地相爭辯計較的人。我平素無用銀借人來提利息，人亦無用銀借我來提利息，總是人攏咒詛我。 |
| 15:11 | 耶和華講：「我真正欲堅固你，互你得著福氣。災禍苦難臨到的時，我真正欲互對敵求你。（ |
| 15:12 | 鐵就是北方的鐵及銅，人豈會遏折伊嗎？） |
| 15:13 | 「因為你的罪惡，我欲佇你的四境內互你的貨財寶物白白互人搶去。 |
| 15:14 | 我亦欲互對敵帶𪜶到你所識的地，因為我佇受氣中有發出火，欲給恁燒燎去。」
|
| 15:15 | 耶和華啊，你知；
求你紀念我，眷顧我， 給我報冤讎佇許個窘迫我的； 你寬容的時通掠我去， 著知我為著你的緣故受凌辱。 |
| 15:16 | 萬軍的上帝──耶和華啊，
我得著你的話就食伊； 你的話佇我是做我心內的歡喜快樂， 因為我是稱做屬你的名者。 |
| 15:17 | 我無坐佇宴樂的人的會中，來快樂；
我因為你的感動家己靜靜坐， 因為你用受氣充滿我。 |
| 15:18 | 我的痛苦怎樣久長無息？
我的傷怎樣𣍐醫得、醫𣍐好啊？ 你款待我豈欲親像欺騙的溪，靠𣍐住的水啊？ |
| 15:19 | 所以耶和華按呢講：你若倒轉來，
我就欲互你倒轉來， 徛佇我的面前； 你若對下賤的中間揀寶貴者出來， 你就欲做親像我的嘴。 𪜶的確欲歸向你， 總是你通歸向𪜶。 |
| 15:20 | 我欲互你對佇此個百姓成做堅固的銅牆；
𪜶欲攻擊你，總是𣍐贏你； 因為我及你佇啲，欲拯救你，牽救你。 這是耶和華講的。 |
| 15:21 | 我欲牽救你脫離歹人的手，
救贖你脫離強暴的人的手頭。 |