| 章節 | 台語漢字本聖經 請按此下載安裝Open Han 2024版字型，免得漏掉造字 |
| 12:1 | 耶利米問耶和華 耶和華啊，我及你辯論的時， 你是公義； 總是我猶愛及你理論： 歹人的路為何亨通？ 大行詭詐者為何得著平安？ |
| 12:2 | 你栽培𪜶，
𪜶亦釘根， 大欉閣結果子。 照𪜶的嘴講，你是近， 照𪜶的心想，你是遠。 |
| 12:3 | 耶和華啊，你知我，你看見我，
試驗我向你的心。 求你將𪜶拖出來， 親像欲刣的羊， 分別伊來聽候刣的日。 |
| 12:4 | 此個地悲哀，
通國的草菜枯焦，欲到底時啊？ 為著徛起遐的百姓的歹， 精牲、飛鳥攏滅無。 因為𪜶講：伊無看見阮的結局。 |
| 12:5 | 耶和華講：你及步行的人相及走，
尚且厭倦， 豈會及馬跑啊？ 你佇平安的地，雖然安穩， 佇約但河邊的樹林欲按怎樣？ |
| 12:6 | 因為連你的兄弟，連你的老父的家，攏用奸詐款待你。
𪜶亦佇你的後面大聲叫， 雖然對你講好話， 你亦莫得信𪜶。 |
| 12:7 | 耶和華為伊的百姓憂傷 我離開我的厝， 放拺我的產業， 將我的心所疼者交佇伊的對敵的手。 |
| 12:8 | 我的產業對我親像樹林內的獅，
伊出聲攻擊我， 因為按呢我怨恨伊。 |
| 12:9 | 我的產業對我豈親像斑點的鷹鳥嗎？
許個鷹鳥豈佇伊的四圍攻擊伊嗎？ 恁著去聚集田野的百獸， 互伊來吞食伊！ |
| 12:10 | 多多牧者毀壞我的葡萄園，
𧿬踏我的份額， 互我好好的份額變做拋荒的曠野。 |
| 12:11 | 𪜶互地拋荒；
地已經荒拋，就對我悲哀。 全地拋荒，因為無人掛意。 |
| 12:12 | 殘害者到曠野中一切光裸裸高的所在；
耶和華的刀對地的此旁到地的彼旁一盡剿滅。 見有血氣者攏無平安。 |
| 12:13 | 𪜶種麥，收成莿帕；
勞苦亦攏無利益。 因為耶和華的大受氣， 𪜶欲為著𪜶的土產來見誚。 |
| 12:14 | 耶和華對以色列厝邊的應允 「論到一切歹厝邊，就是害著我所互我的百姓以色列承接的產業的。」耶和華有按呢講：「看啊，我欲將𪜶拔出𪜶的地，閣欲將猶大家對𪜶中間拔出來。 |
| 12:15 | 我拔出𪜶以後，我欲倒轉來憐憫𪜶，導𪜶倒來，逐人歸伊的本業，逐人歸伊的本所在。 |
| 12:16 | 𪜶若肯殷勤學習我的百姓的道路，指我的名咒誓講：『耶和華是活者』，親像𪜶前教示我的百姓指巴力來咒誓一樣，𪜶就欲得著建立佇我的百姓的中間。 |
| 12:17 | 𪜶若聽，就我欲拔出此國，拔出來滅伊。這是耶和華講的。」 |