| 章節 | 台語漢字本聖經 請按此下載安裝Open Han 2024版字型，免得漏掉造字 |
| 3:1 | 無忠心的以色列 有啲講：人若離出伊的某， 某就離開伊，嫁別人， 就伊前的丈夫豈通閣親近伊嗎？ 若按呢，彼個地方豈無染著垃墋嗎？ 獨獨你及多多親愛者行淫， 猶久通歸佇我。 這是耶和華講的。 |
| 3:2 | 你著攑目看諸個光裸裸高的所在，
佇叨落無有淫行啊？ 你坐佇路邊聽候， 親像亞拉伯人佇曠野一樣， 閣用你的淫行邪惡拍垃墋全地。 |
| 3:3 | 因為按呢好的雨水停止，
春天的雨無落。 你猶有娼妓的面， 知見誚。 |
| 3:4 | 你豈對此時叫我講：
我的父啊，你是我少年的時引導我者。 |
| 3:5 | 伊豈永永囥受氣，留到路尾嗎？
看啊，你有按呢講， 猶久盡你所會的行歹。 |
| 3:6 | 以色列及猶大應當悔改 當約西亞王坐位的時，耶和華閣對我講：「悖逆的以色列所做的，你有看見無？伊上諸個高山，佇攏總青翠的樹腳行淫亂。 |
| 3:7 | 伊行諸個代誌以後，我講伊欲歸倚我，總是伊無。伊奸詐的小妹猶大亦有看見。 |
| 3:8 | 悖逆的以色列行淫亂，我為著此個緣故互伊離書離出伊；我看見伊奸詐的小妹猶大猶原無驚，亦是去行淫。 |
| 3:9 | 伊隨便行伊的淫亂，就拍垃墋此個地方，就及石頭柴頭行淫。 |
| 3:10 | 雖然有諸個一切的事，伊奸詐的小妹猶大猶原無專心歸向我，不過是假意若定。這是耶和華講的。」 |
| 3:11 | 耶和華對我講：「悖逆的以色列比奸詐的猶大猶卡有義。 |
| 3:12 | 你著去向北方傳諸個話講：
耶和華講：悖逆的以色列啊，著倒來！ 我無欲用受氣的目睭看恁； 因為我是慈愛者， 我無欲永遠囥受氣。 這是耶和華講的。 |
| 3:13 | 獨獨著認你的罪，
就是你違背耶和華──你的上帝， 佇攏總青翠的樹腳，走東走西尋別個， 無聽趁我的話。 這是耶和華講的。 |
| 3:14 | 耶和華講：悖逆的子兒啊，著倒來！
因為我做恁的丈夫， 閣我欲將恁對一個城取一人， 對一族取二人，帶到錫安。 |
| 3:15 | 我欲將合我的心的牧者賞賜恁。𪜶欲用知識及智慧養飼恁。」 |
| 3:16 | 耶和華講：「恁佇國內生湠多多；當許個日子，人無欲閣講起耶和華的約櫃，亦無欲記佇心裡，攏𣍐記得，攏無去尋，亦無閣做伊。 |
| 3:17 | 彼時，人欲稱耶路撒冷做耶和華的寶座；萬國欲聚集到遐，就是因為耶和華的名來到耶路撒冷。𪜶無閣照家己歹心的剛硬行代誌。 |
| 3:18 | 當許個日子，猶大家欲及以色列家同行，對北方的地相及來，到我賞賜恁的列祖做業的地。」 |
| 3:19 | 上帝的百姓拜偶像 總是我講：我怎樣會通排列恁佇諸個子的中間， 將好的地賞賜你， 就是列國中上好的業。 我閣講：恁著稱我講，我的父啊， 亦無閣倒轉去隨我。 |
| 3:20 | 以色列家啊，恁對我行奸詐，
真正親像婦人行奸詐離開伊的丈夫。 這是耶和華講的。 |
| 3:21 | 佇光裸裸高的所在聽見聲，
就是以色列人啼哭懇求的聲， 就是因為𪜶行邪僻的路， 𣍐記得𪜶的上帝──耶和華。 |
| 3:22 | 恁諸個悖逆的子兒啊，著倒來！
我欲醫好恁的悖逆。 看啊，阮來到你遮， 因為你是阮的上帝──耶和華。 |
| 3:23 | 對小山抑是大山的鬧熱向望得著幫助，
實在是空空。 以色列的得著救，真正在佇阮的上帝──耶和華。 |
| 3:24 | 對阮少年以來，彼個通見誚的事，將阮的列祖所著磨來得著的，就是𪜶的羊群、牛群，及𪜶的子、查某子，攏吞食去。 |
| 3:25 | 阮倒佇阮的見誚中！阮的凌辱遮蓋阮；因為對少年到今，阮及阮的列祖常常得罪阮的上帝──耶和華，無聽趁阮的上帝──耶和華的聲。 |