| 章節 | 台語漢字本聖經 請按此下載安裝Open Han 2024版字型，免得漏掉造字 |
| 63:1 | 耶和華恩待以色列 此個對以東來，對波斯拉到， 穿紅衫， 衣裳行伍， 有大氣力大步啲行的是是誰啊？ 就是我， 是照公義講話， 有大氣力會行拯救者。 |
| 63:2 | 你的衣裳怎樣有紅色？
你的衣服怎樣親像踏酒窟者啊？ |
| 63:3 | 我家己一個踏酒窟；
眾百姓的中間無一人及我佇啲。 我受氣踏𪜶， 大受氣𧿬踏𪜶。 𪜶的血濺佇我的衫， 閣染垃墋我一切的衣裳。 |
| 63:4 | 因為報讎的日佇我的心內；
我救贖我的百姓的年已經到。 |
| 63:5 | 我看，也無幫助者；
我卬愕，因為無有扶持者。 所以，我家己的手給我行拯救； 我的大受氣給我扶持。 |
| 63:6 | 我受氣，踏列邦；
大受氣，互𪜶醉醉， 互𪜶的血流佇地裡。 |
| 63:7 | 耶和華對以色列的好 我欲照耶和華一切所賞賜咱的， 講起耶和華的慈愛及耶和華的名聲， 及伊向以色列家所施的大恩； 就是照伊的憐憫 及豐盛的慈愛賞賜𪜶的。 |
| 63:8 | 因為伊講：𪜶真正是我的百姓，
無行虛假的子兒； 按呢，伊就做𪜶的救主。 |
| 63:9 | 佇𪜶一切的苦難中，
伊也同受苦難； 閣伊面前的使者拯救𪜶； 伊用慈愛及憐憫救贖𪜶； 佇古早的日常常抱𪜶，懷𪜶。 |
| 63:10 | 總是𪜶悖逆，互伊的聖神憂悶。
伊就反轉做𪜶的對敵， 本身來攻擊𪜶。 |
| 63:11 | 百姓就記得古早摩西的日，講：
導𪜶及伊全群的牧者 對海裡出來的，佇叨落啊？ 將伊聖的神下佇𪜶中間者佇叨落啊？ |
| 63:12 | 互伊榮光的手佇摩西的正手行動，
佇𪜶的面前將水分開， 欲為著家己立永遠的名， |
| 63:13 | 導𪜶經過海中，
親像馬行佇曠野， 互𪜶無著觸者，佇叨落啊？ |
| 63:14 | 耶和華的神互𪜶得著安息，
親像精牲落到山腳； 按呢，你亦導你的百姓， 為著家己建立榮光的名。 |
| 63:15 | 求主憐憫幫助 求你對天俯落看， 對你聖潔榮光的所在看。 你的熱心及你大權能的所做佇叨落啊？ 你疼痛的心腸及憐憫對我停止。 |
| 63:16 | 亞伯拉罕雖然識阮，
以色列認阮， 總是你是阮的父。 耶和華啊，你是阮的父； 對萬古以來，你的名稱做「救贖阮的主」。 |
| 63:17 | 耶和華啊，你啥事互阮行錯離開你的路，
互阮的心硬，無敬畏你啊？ 求你為著你的奴僕， 為你的產業支派的緣故， 倒轉來。 |
| 63:18 | 你聖的百姓不過暫時得著此個產業；
阮的對敵已經𧿬踏你的聖所。 |
| 63:19 | 阮親像對古早未曾互你治理的人，
親像未曾用你的名來稱呼者。 |