| 章節 | 台語漢字本聖經 請按此下載安裝Open Han 2024版字型，免得漏掉造字 |
| 60:1 | 耶路撒冷未來的榮耀 起來啊，發出光！因為你的光已經到！ 耶和華的榮光發現，照佇你的頂面。 |
| 60:2 | 看啊，黑暗欲蓋全地，
黑黑暗暗遮蓋列國， 總是耶和華欲發現照你， 伊的榮光欲出現佇你的身上。 |
| 60:3 | 列國欲來就近你的光；
君王欲來就近你發現的大光。 |
| 60:4 | 你攑目看四方；
𪜶攏聚集來你遮。 你的眾子對遠遠來； 你的眾查某子亦欲互人抱來。 |
| 60:5 | 彼時，你看見就有榮光；
你的心大卬愕大開闊； 因為大海豐盛的財物欲轉返來歸你； 列國的財寶亦欲來歸你。 |
| 60:6 | 歸陣的駱駝，
及米甸以及以法單陵的駱駝欲遍滿你的境內； 示巴的眾人攏欲到； 欲帶黃金乳香來， 亦欲報傳耶和華的名聲。 |
| 60:7 | 基達的羊群攏欲聚集到你遮，
尼拜約公的綿羊欲做你的路用， 佇我的壇頂欲得著接納； 我榮光的厝我欲榮光伊。 |
| 60:8 | 許個飛來親像雲，
閣親像鴿飛來伊的巢的，是是誰啊？ |
| 60:9 | 諸個海嶼欲聽候我，
他施的船隻欲做頭， 將你的眾子，連𪜶的金銀對遠遠做一下帶來， 攏為著耶和華──你的上帝的名， 閣為著以色列的聖者， 因為伊已經榮光你。 |
| 60:10 | 外邦人欲起你的城牆；
𪜶的王欲服事你。 我曾受氣拍你， 今欲施恩憐憫你。 |
| 60:11 | 你的城門欲常常開，
日暝無關； 互人將列國的財寶帶來歸你， 亦將𪜶的君王牽來。 |
| 60:12 | 因為見若百姓及國服事你者，欲滅無，
許個百姓欲全然荒廢。 |
| 60:13 | 黎巴嫩的榮光，
就是松樹、杉樹、黃楊樹， 攏欲相及歸你， 為著欲妝飾我的聖所； 我亦欲互我腳踏的所在得著榮光。 |
| 60:14 | 平素苦楚你者，𪜶的子孫攏欲到你的面前俯腰；
看輕你者，攏欲佇你的腳下跪拜。 𪜶欲稱你做「耶和華的城」， 做「以色列的聖者的錫安」。 |
| 60:15 | 你前受放拺受厭惡，
甚至無人經過， 今我欲互你變做永遠的榮華， 成做歷代的喜樂。 |
| 60:16 | 你欲食萬國的奶，
閣吸諸個君王的奶頭。 就知我──耶和華是你的救主， 是救贖你的主，雅各的大權能者。 |
| 60:17 | 我欲帶金來替銅，
帶銀來替鐵， 銅來替柴， 鐵來替石； 亦欲用和平做你的官長， 用公義做你的監督。 |
| 60:18 | 你的地方無閣聽見強暴，
境內無閣聽見拋荒毀滅的事。 你欲稱你的牆做「拯救」， 稱你的門做「謳咾」。 |
| 60:19 | 日頭無閣做你日時的光；
月亦無閣發光照你。 因為耶和華欲做你永遠的光； 你的上帝欲做你的榮耀。 |
| 60:20 | 你的日頭無閣落；
你的月亦無勼無去； 因為耶和華欲做你永遠的光。 你悲哀的日亦明白啦。 |
| 60:21 | 你的百姓攏成做義人，
永遠得著地做業； 是我所種的樹栽，我的手所做的， 互我得著榮光。 |
| 60:22 | 至細者欲成做一千；
極卑微者欲成做強的國。 我──耶和華欲照定著的期緊緊成伊。 |