| 章節 | 台語漢字本聖經 請按此下載安裝Open Han 2024版字型，免得漏掉造字 |
| 58:1 | 真正的禁食 你著大聲喉叫，通限止； 出大聲，親像歕哨角。 對我的百姓講明𪜶的過失； 對雅各的家講明𪜶的罪惡。 |
| 58:2 | 𪜶日日尋我，
歡喜知我的道路， 親像行義的百姓， 無離開𪜶的上帝的法律， 𪜶求我照公義的審判， 歡喜親近上帝。 |
| 58:3 | 𪜶講：阮禁食，你啥事無看見？
阮刻苦阮的心，你啥事知啊！ 看啊，恁禁食的日猶久家己安樂， 強迫人給恁做苦工。 |
| 58:4 | 看啊，恁禁食，是欲相爭，相冤家，
用兇惡的拳頭拇拍人。 恁今仔日禁食， 𣍐會互恁的聲聽到頂面。 |
| 58:5 | 此款的禁食豈是我所揀、
互人刻苦伊的心的日嗎？ 豈是互人俯頭親像蘆竹， 用麻布及火灰舖佇伊的身軀下嗎？ 這豈通稱做禁食互耶和華所歡喜的日嗎？ |
| 58:6 | 我所揀的禁食豈是解開兇惡的索，
解放背軛的索， 互受制壓的得著自由， 摃折一切的軛嗎？ |
| 58:7 | 豈是將你的米糧分互枵餓的人，
將四界流的喪鄉人接納佇你的家， 看見褪腹裼的人互伊穿， 對家己的骨肉亦無閃去匿嗎？ |
| 58:8 | 按呢，你的光欲發出親像天光早的光；
你的傷欲緊緊得著好。 你的公義欲行佇你的頭前； 耶和華的榮光欲做你後面的保護。 |
| 58:9 | 彼時你求叫，耶和華欲聽你；
你懇求，伊欲講：我佇遮。 你若對你中間除去重的軛， 及指著人的指頭仔，以及濫糝講的話， |
| 58:10 | 你的心若憐憫枵餓的人，
互困苦的人得著滿足， 你的光就欲佇黑暗中發現， 你的黑暗欲變親像日中晝。 |
| 58:11 | 耶和華亦欲常常引導你，
佇亢旱的地互你心滿意足， 骨頭勇壯。 你欲親像灌沃的園， 閣親像流𣍐乾的水泉。 |
| 58:12 | 許個對你出的人欲起造久久已經荒廢的所在；
你欲建立歷代毀壞的地基。 你欲稱做補破隙者， 及閣修理路互人徛起者。 |
| 58:13 | 守安息日者的報償 你若對安息日禁止你的腳， 佇我的聖日無做家己所歡喜的， 稱安息日做通歡喜的， 稱耶和華的聖日做通尊重的； 亦閣尊敬伊， 無辦家己的私事， 無趁家己的私意， 無講私奇話， |
| 58:14 | 你就欲因為耶和華來歡喜。
我欲互你上到地上高的所在， 閣用你的祖雅各的產業養飼你。 這是耶和華親嘴講的。 |