| 章節 | 台語漢字本聖經 請按此下載安裝Open Han 2024版字型，免得漏掉造字 |
| 51:1 | 安慰耶路撒冷的話 恁諸個追趇公義、 尋耶和華者，著聽我！ 恁著想看恁對遐拍出來的石磐， 對遐掘出來的土孔。 |
| 51:2 | 著想看恁的祖公亞伯拉罕
及生恁的撒拉； 因為伊孤單一人的時， 我揀召伊，賜福伊， 互伊加添多多。 |
| 51:3 | 因為耶和華已經安慰錫安
亦安慰伊一切拋荒的所在， 互伊的曠野親像伊甸， 互沙漠親像耶和華的園； 佇𪜶中間欲有歡喜、快樂、感謝， 及唱歌的聲。 |
| 51:4 | 我的百姓啊，著注意聽我；
我的國民啊，著俯耳孔聽我； 因為法律欲對我出； 我欲立我的公理來做列邦的光。 |
| 51:5 | 我的公義近啦；
我的救恩發出。 我的手欲判斷列邦； 海嶼攏欲聽候我，閣欲倚靠我的手。 |
| 51:6 | 恁著攑目向天，
俯頭看地； 因為諸個天欲親像煙雲消散， 地欲親像衫漸漸舊； 伊的徛起的百姓亦欲親像按呢死無。 只有我的救恩永遠佇啲， 我的公義亦無廢無。 |
| 51:7 | 知識公義，存我的教示佇心內的百姓，
著聽我的話， 莫得驚人的譏刺， 亦莫得因為人的誹謗來驚惶。 |
| 51:8 | 因為蛀蟲欲食𪜶，親像食衣裳；
剪蟲欲食𪜶，親像食羊毛。 只有我的公義永遠佇啲， 我的救恩直到萬代。 |
| 51:9 | 耶和華的手啊，起來！起來！
施出大氣力起來， 親像早時的年日、古早的世代一樣。 從前拍碎拉哈伯， 鑿透龍者，豈是你嗎？ |
| 51:10 | 互海及深淵的水乾去、
互海深的所在變做路，互受贖的百姓經過者， 豈是你嗎？ |
| 51:11 | 耶和華救贖的百姓欲倒轉來，
欲唱歌來到錫安； 得著永遠的歡喜做冕旒。 𪜶欲歡喜快樂； 憂悶吐氣攏欲走去。 |
| 51:12 | 我，我是安慰恁的。
你是甚麼人，竟然驚彼個欲死的人？ 驚彼個欲變做親像草的世間人？ |
| 51:13 | 亦𣍐記得展開諸個天、安定地的地基、
創造你的耶和華？ 通日因為暴虐者的大受氣，來驚惶， 照伊圖謀欲毀滅的情形， 其實彼個暴虐者的大受氣佇叨落啊？ |
| 51:14 | 受壓迫的欲緊緊得著解放，
的確無死來落穴； 伊的米糧亦無絕。 |
| 51:15 | 我是耶和華──你的上帝──
搖動大海，互伊的湧嘩嘩哮── 萬軍的耶和華是伊的名。 |
| 51:16 | 我將我的話下佇你的嘴，
用我的手的影遮蓋你， 為著欲開天闢地， 閣對錫安講：你是我的百姓。 |
| 51:17 | 耶路撒冷苦難的結束 耶路撒冷啊，起來！ 起來！竪啲！ 你對耶和華的手中飲伊大受氣的杯， 飲彼個互人顛顛倒倒的杯盞，飲到乾乾。 |
| 51:18 | 伊所生諸個子的中間，無一個引導伊；
伊所養飼大漢諸個子的中間，無一個牽伊的手。 |
| 51:19 | 此二項臨到你，
是誰會替你哀傷啊？ 就是有衰敗、及滅無、飢荒、及劍， 我欲怎樣安慰你？ |
| 51:20 | 你諸個子昏去，
倒佇逐個街路口， 親像鹿佇羅網的中間， 受耶和華滿滿的受氣 ──你的上帝的責備。 |
| 51:21 | 所以，你此個困苦閣醉的，卻是因為酒來醉，
你著聽。 |
| 51:22 | 你的主耶和華──
就是為著伊的百姓伸冤的上帝，按呢講： 看啊，我已經將彼個互人顛顛倒倒的杯， 就是我大受氣的杯盞， 對你的手提出來； 你的確免閣飲。 |
| 51:23 | 我欲將此個杯下佇歹款待你的人的手中；
𪜶曾對你講：你著俯落去， 出在阮踏過去！ 你就用尻脊骿做親像地， 親像街路，出在人經過。 |