| 章節 | 台語漢字本聖經 請按此下載安裝Open Han 2024版字型，免得漏掉造字 |
| 30:1 | 及埃及訂立無路用的約 耶和華講： 災禍啊！諸個悖逆的子。 𪜶相及計謀，無對我的意思， 𪜶結盟約，無對我的神， 致到罪上加罪； |
| 30:2 | 起身落去埃及，並無請問我；
欲倚靠法老的勢力加添家己的勢力， 亦閃匿佇埃及的致蔭下。 |
| 30:3 | 所以，法老的勢力欲做恁的見誚；
閃匿佇埃及的致蔭下，欲做恁的漏氣。 |
| 30:4 | 伊的首領已經到瑣安；
伊的使者已經到哈內斯。 |
| 30:5 | 𪜶欲因為𣍐利益𪜶的百姓來見誚。
彼個百姓是做幫助，亦是做利益， 獨獨是做見誚，做凌辱。 |
| 30:6 | 論南方的精牲的默示：
𪜶將財物馱佇驢仔尻脊頂， 將寶物載佇駱駝的陵， 經過艱難困苦的地， 就是母的獅、公的獅、毒蛇，及火焰飛的龍的地， 去彼個無利益𪜶的百姓遐。 |
| 30:7 | 埃及的幫助是空空無利益；
所以我稱伊做「坐啲𣍐振動的拉哈伯」。 |
| 30:8 | 順服的百姓 今你去， 佇𪜶的面前將此個話寫佇牌裡， 記佇冊裡， 留佇後代，到永遠。 |
| 30:9 | 因為𪜶是悖逆的百姓、講白賊的子兒，
肯聽趁耶和華的教示的子兒。 |
| 30:10 | 𪜶對先見者講：莫得先見，
對先知講：莫得對阮講正直的話； 著對阮講柔軟的話， 講虛假的事。 |
| 30:11 | 恁著放拺正路，離開正直的路，
通佇阮的面前閣提起以色列的聖者。 |
| 30:12 | 所以，以色列的聖者按呢講：
因為恁棄拺此個話， 憑信暴虐及乖僻，來倚靠伊， |
| 30:13 | 所以，此個罪惡佇恁的身上，
親像欲倒的裂痕肨出佇高牆的， 霎仔久的中間忽然間倒壞； |
| 30:14 | 伊欲毀壞伊，親像人毀壞燒磁人的磁器，
摃碎亦無保惜， 致到碎塊的中間尋無一片通對火爐來取火， 對池內來舀水。 |
| 30:15 | 主耶和華──以色列的聖者曾按呢講：
恁的得著救在佇越倒轉及安息； 恁得著氣力在佇平靜及信靠； 總是恁無欲。 |
| 30:16 | 恁講：無啊，阮欲騎馬來走。
所以恁得欲走； 閣講：阮欲騎彼個真𠢕走的精牲。 所以追趕恁者，亦欲真𠢕走。 |
| 30:17 | 一人哄喝，就一千人逃走；
五人哄喝，就恁攏欲逃走； 致到所剩的，親像山頂的旗杆， 山頭的大旗。 |
| 30:18 | 耶和華因為按呢欲聽候，來施恩惠互恁；
閣因為按呢欲起來，憐憫恁。 因為耶和華是公平的上帝； 凡若聽候伊者攏有福氣！ |
| 30:19 | 上帝欲賜福互伊的百姓 恁諸個徛起佇錫安、佇耶路撒冷的百姓啊；你的確無閣啼哭。主欲因為你哀求的聲大施恩互你；伊聽見就欲應你。 |
| 30:20 | 主欲互恁佇患難中有餅，佇艱苦中有水，恁的先生無閣閃匿；你欲親目看見你的先生。 |
| 30:21 | 你偏佇左偏佇右的時，耳孔內欲聽見有聲佇你的後面講：「這就是路，你著行伊。」 |
| 30:22 | 你所雕刻的偶像，用銀鑲的，所鑄造的偶像用金鍍的，你欲拍垃墋伊，欲棄拺伊，親像污穢的物，對伊講：「去啊！」 |
| 30:23 | 你撒種子佇地裡，伊欲給伊落雨，亦欲互地所出的米糧真好真豐盛。到彼時，你的精牲欲佇寬闊的草場食草。 |
| 30:24 | 犂園的牛及驢仔子欲食撒鹽的料；此個料是用風鼓及簸箕過颺的。 |
| 30:25 | 佇大刣人，守更樓倒壞的日，逐個高山大嶺欲有河水溪流。 |
| 30:26 | 當耶和華包伊的百姓損傷的所在，醫治伊的百姓拍傷的日，月的光欲親像日的光，日的光欲加七倍，親像七個日的光一樣。 |
| 30:27 | 上帝欲刑罰亞述 看啊，耶和華的名對遠遠來， 受氣𤏸起來，密密的煙淐高。 伊的嘴唇有受氣滿滿； 伊的舌親像吞滅的火。 |
| 30:28 | 伊的氣親像漲滿的河水，漲到頷頸，
欲用毀滅的篩來篩萬國， 閣佇眾百姓的嘴內欲有互人行錯誤的馬咬韁。 |
| 30:29 | 恁欲唱歌，親像守聖節的暝，閣心內歡喜，親像人歕笛仔，上耶和華的山，到以色列的石磐遐。 |
| 30:30 | 耶和華欲互人聽伊威嚴的聲，閣互人看見伊的手拍落去及受氣中的受氣，吞滅的火焰，脆雷、大風、冰雹。 |
| 30:31 | 所以亞述人欲因為耶和華的聲大驚惶；伊欲用枴仔來拍伊。 |
| 30:32 | 耶和華欲將定著的枴仔到佇伊的身上；逐擺拍落去，就聽見彈琴拍鼓的聲。交戰的時，耶和華動起伊的手，及伊交戰。 |
| 30:33 | 因為陀斐特對早就設立，為著王來備辦，深閣闊；其中歸堆的是火及多多柴。耶和華的氣親像一條的硫磺火互伊𤏸起來。 |