| 章節 | 台語漢字本聖經 請按此下載安裝Open Han 2024版字型，免得漏掉造字 |
| 7:1 | 智戇的分別 名聲比好的膏油卡好； 人死的日比出世的日卡好。 |
| 7:2 | 去喪事的家，
比去宴樂的家卡好； 因為這是眾人的結局， 活的人也欲將這事下佇心裡。 |
| 7:3 | 憂悶比笑卡好；
因為面帶憂容，是互心快樂。 |
| 7:4 | 智慧的人的心佇喪事的家；
愚戇的人的心佇快樂的家。 |
| 7:5 | 聽智慧的人的責備，
比聽愚戇人的唱曲卡好。 |
| 7:6 | 戇人的笑，
親像鼎下燒茦仔的聲； 這也是空虛。 |
| 7:7 | 勒索會互智慧的人變做戇；
賄賂會敗壞人的心術。 |
| 7:8 | 代誌的結局贏過代誌的起頭；
心吞愞，贏過心驕傲。 |
| 7:9 | 你的心莫得躁急來受氣，
因為受氣存佇戇人的心懷。 |
| 7:10 | 你通講：
按怎樣前的日贏過現今的日？ 因為你按呢問，是出佇智慧。 |
| 7:11 | 智慧及產業平平好，
對佇看見日光的人閣卡有利益。 |
| 7:12 | 因為智慧會致蔭人，
錢銀也會致蔭人。 獨獨智慧會保全伊本人的活命。 這就是知識特色的利益。 |
| 7:13 | 你著想上帝所做；
因為伊互伊彎的，是誰會互伊直？ |
| 7:14 | 亨通的日你著歡喜；抵著患難的日你著想；因為上帝互二項平平排啲，為著欲互人查𣍐出身後有甚麼事。 |
| 7:15 | 有義人行義，反轉滅無；有歹人行歹，反轉食長歲壽。我佇空虛的日攏有看見。 |
| 7:16 | 莫得行義甚多，莫得智慧過頭，啥事敗壞家己啊？ |
| 7:17 | 莫得行歹甚多，也莫得做戇人，啥事未到期來死啊？ |
| 7:18 | 你持守此個是好，彼個也通放手；因為敬畏上帝的人，欲脫離這一切的事。 |
| 7:19 | 智慧互智慧的人有能力贏過城內十個掌權的。 |
| 7:20 | 行好無犯罪的義人，世上實在無。 |
| 7:21 | 人所講的話，通攏總下佇心裡，驚了聽見你的奴僕咒詛你。 |
| 7:22 | 因為你的心家己知，你也曾多多擺咒詛別人。 |
| 7:23 | 我曾用智慧試驗這一切的事；我講，我欲做智慧的，總是這離開我遠遠。 |
| 7:24 | 所有的，是遠閣深深，是誰會測𢜬啊？ |
| 7:25 | 我越轉想，我專心愛知，愛查考，也尋智慧及萬事的理由；閣愛知邪惡是愚戇，愚蠢是癲狂。 |
| 7:26 | 我閣查出一項比死卡苦，就是一等號的婦仁人：伊的心是活罩及羅網，伊的手是鎖鍊。凡若得著上帝歡喜的人得著閃避；總是有罪的人互伊掠著。 |
| 7:27 | 傳道者講：「看啊，我愛知伊的數額，一項一項比較伊，就尋著此個， |
| 7:28 | 我的心愛尋伊也𣍐得著，佇一千人的中間我會尋著一個查甫人，佇許個人的中間，我無尋著一個婦仁人。」 |
| 7:29 | 看啊，我只有尋著此個，就是上帝創造人本是正直，總是𪜶尋出多多奇巧的計謀。 |