| 章節 | 台語漢字本聖經 請按此下載安裝Open Han 2024版字型，免得漏掉造字 |
| 3:1 | 萬事攏有伊的期 天下萬般攏有伊的期， 萬項事攏有伊的時。 |
| 3:2 | 有出世的時，有死的時；
有栽種的時，有拔出所栽種者的時； |
| 3:3 | 有刣死的時，有醫好的時；
有拆毀的時，有起造的時； |
| 3:4 | 有啼哭的時，有好笑的時；
有哀慘的時，有跳舞的時； |
| 3:5 | 有㧒石頭的時，有拾石頭的時；
有通抱的時，有通抱的時； |
| 3:6 | 有尋著的時，有失落的時；
有保守的時，有放拺的時； |
| 3:7 | 有拆裂的時，有補紩的時；
有靜靜的時，有講話的時； |
| 3:8 | 有疼惜的時，有怨恨的時；
有交戰的時，有和好的時。 |
| 3:9 | 做工的人佇伊所勞碌的有甚麼利益啊？ |
| 3:10 | 我有看見上帝所互世間人的勞碌，互𪜶佇彼中間來練習。 |
| 3:11 | 上帝造萬物，各照伊的時成做美妙，閣將永遠的觀念下佇人的心。總是上帝對頭到尾所做成的，人𣍐會測𢜬伊。 |
| 3:12 | 我知從中無一項卡好佇一生快樂，閣行好； |
| 3:13 | 閣人人也食也飲，佇伊一切所勞碌的來享福，這也是上帝的恩賜。 |
| 3:14 | 我知上帝一切所做的欲永遠佇啲；𣍐加添，𣍐減少。上帝按呢行，是互人佇伊的面前驚畏。 |
| 3:15 | 現今所有的前已經有，將來欲有的早已經有，過身的事上帝閣尋伊。 |
| 3:16 | 世上的無公平 我閣看見日光的下面，佇審判的所在有奸惡，佇公義的所在也有奸惡。 |
| 3:17 | 我心內講，上帝欲審判義人及歹人；因為佇遐，逐項的事逐項的工，攏有定著的時。 |
| 3:18 | 我心內講，這是為著世間人的緣故，上帝欲試驗𪜶，互𪜶知家己是禽獸。 |
| 3:19 | 因為世間人所抵著的，禽獸也抵著，所抵著攏是一樣：此個按呢死，彼個也是按呢死，攏同一樣喘氣。人𣍐卡贏禽獸，因為攏是空虛。 |
| 3:20 | 攏到一所在，攏出佇土粉，也攏歸佇土粉。 |
| 3:21 | 人的魂上頂面，獸的魂墜落地，是誰知是按呢抑是？ |
| 3:22 | 所以，我看見人無一項卡好佇伊所經營的來歡喜，因為這是伊的份額。伊身後的事是誰會互伊閣來看見啊？ |