| 章節 | 台語漢字本聖經 請按此下載安裝Open Han 2024版字型，免得漏掉造字 |
| 7:1 | 耶和華對摩西講：「看啊，我互你對佇法老做上帝，你的兄亞倫欲做你的先知。 |
| 7:2 | 見若我所吩咐你的，你攏著講伊。你的兄亞倫著對法老講，互伊准以色列人出伊的地。 |
| 7:3 | 我欲互法老的心硬，也欲佇埃及地行我多多的神蹟奇事。 |
| 7:4 | 總是法老無欲聽恁；我欲伸我的手佇埃及，用大的審判導我的軍隊，我的百姓以色列人出埃及地。 |
| 7:5 | 我伸我的手佇埃及，導以色列人對𪜶中間出來的時，埃及人就知我是耶和華。」 |
| 7:6 | 摩西、亞倫就按呢行；耶和華怎樣吩咐𪜶，𪜶就照按呢行。 |
| 7:7 | 𪜶及法老講話的時，摩西八十歲，亞倫八十三歲。 |
| 7:8 | 亞倫的枴仔 耶和華對摩西、對亞倫講： |
| 7:9 | 「法老若對恁講：『恁著行一件奇事來看覓唧！』你著對亞倫講：『攑你的枴仔來㧒佇法老的面前，互伊變做蛇。』」 |
| 7:10 | 摩西、亞倫入去見法老，就按呢行照耶和華所吩咐的。亞倫將伊的枴仔㧒佇法老及伊的人臣的面前，枴仔就變做蛇。 |
| 7:11 | 法老也召智慧的人及師公來；𪜶是埃及的博士，也用𪜶的邪術照按呢行。 |
| 7:12 | 𪜶逐人㧒𪜶的枴仔，攏變做蛇；總是亞倫的枴仔吞𪜶的枴仔。 |
| 7:13 | 法老的心硬，無欲聽𪜶，抵抵照耶和華所講的。 |
| 7:14 | 埃及災禍──血災 耶和華對摩西講：「法老的心固執，伊准百姓去。 |
| 7:15 | 天光早，你去見法老，看啊，伊出去水邊，你著徛佇河邊等接伊，你的手著攑彼支變蛇的枴仔， |
| 7:16 | 對伊講：『耶和華──希伯來人的上帝差我來見你，講：准我的百姓去，通佇曠野服事我。看啊，到今你猶未有聽。 |
| 7:17 | 耶和華按呢講：你欲對此一件知我是耶和華。看啊，我欲用我手裡的枴仔拍河中的水，水就變做血； |
| 7:18 | 河裡的魚欲死，河也欲臭味，埃及人厭賤愛飲河的水。』」 |
| 7:19 | 耶和華對摩西講：「你著給亞倫講：『攑你的枴仔伸你的手佇埃及諸個水的頂面，就是佇𪜶的江、河、池及一切的水窟的頂面，互𪜶攏變做血。佇埃及遍地，無論柴的器具、石的器具，攏欲有血。』」 |
| 7:20 | 摩西、亞倫就按呢行照耶和華所吩咐。佇法老及伊的人臣的面前攑起枴仔拍河裡的水，河裡的水攏變做血。 |
| 7:21 | 河裡的魚攏死，河也臭味，埃及人𣍐會飲河裡的水；埃及遍地攏有血。 |
| 7:22 | 埃及的博士，也用𪜶的邪術照按呢行。法老的心硬，聽𪜶，抵抵照耶和華所講的。 |
| 7:23 | 法老倒去伊的宮內，此個事伊也無掛心。 |
| 7:24 | 埃及人佇河的雙旁掘地，愛得著水通飲，因為河的水𪜶𣍐飲得。 |
| 7:25 | 耶和華拍河了後歷過七日。 |