| 章節 | 台語漢字本聖經 請按此下載安裝Open Han 2024版字型，免得漏掉造字 |
| 96:1 | 上帝是至高的君王 ( 代上 16:25-33 ) 恁著向耶和華唱新的歌！ 全地攏著向耶和華唱歌！ |
| 96:2 | 著向耶和華唱歌，祝謝伊的名！
日日傳報伊的救恩！ |
| 96:3 | 佇列邦的中間講起伊的榮光！
佇萬百姓的中間講起伊奇妙的所做！ |
| 96:4 | 因為耶和華做大，應該受極大的謳咾；
伊佇眾神明的頂面，應該受敬畏。 |
| 96:5 | 因為列邦的上帝攏是虛假；
獨獨耶和華創造諸個天。 |
| 96:6 | 佇伊的面前有尊貴及威嚴；
佇伊的聖所有權能及榮光。 |
| 96:7 | 百姓中的逐族啊，恁著將權能榮光，歸互耶和華，
歸互耶和華！ |
| 96:8 | 用伊的名所應該得著的榮光歸互耶和華，
帶禮物來入伊的院。 |
| 96:9 | 著用聖潔的妝飾敬拜耶和華；
全地佇伊的面前愕愕惙！ |
| 96:10 | 佇列邦中著講：耶和華做王！
世界堅固，𣍐搖動； 伊欲照公平審判萬百姓。 |
| 96:11 | 願天歡喜，地快樂！
願海及其中所充滿的攏出大聲！ |
| 96:12 | 願田園及其中所有的攏快樂！
彼時，樹林內的樹木攏欲佇耶和華的面前出歡喜的聲。 |
| 96:13 | 因為伊來啦，伊來欲審判全地。
伊欲照公義審判世界， 照伊的信實審判萬百姓。 |