| 章節 | 台語漢字本聖經 請按此下載安裝Open Han 2024版字型，免得漏掉造字 |
| 35:1 | 大衛的詩。 求助的祈禱 耶和華啊，及我相爭的，求你及𪜶相爭！ 及我交戰的，求你及𪜶交戰！ |
| 35:2 | 提大細的盾牌，
起來幫助我。 |
| 35:3 | 抽出槍，阻止許個追趕我者；
對我的神魂講：我是拯救你者。 |
| 35:4 | 願許個數想我的生命的人，受見誚凌辱！
願許個計謀害我的人，越倒轉漏氣！ |
| 35:5 | 願𪜶親像風吹的粗糠，
有耶和華的使者啲趕𪜶。 |
| 35:6 | 願𪜶的路暗閣滑，
有耶和華的使者啲趕𪜶。 |
| 35:7 | 因為𪜶無因端為我暗設羅網佇坑內，
無因端掘陷坑，欲害我的生命。 |
| 35:8 | 願佇伊無拍算的時災禍到伊的身上！
願伊暗設的羅網纏著伊家己！ 願伊跋落彼內面受害！ |
| 35:9 | 就我的心欲佇耶和華來快樂，
佇伊的救恩來歡喜。 |
| 35:10 | 我的骨頭攏欲講：
耶和華啊，是誰會親像你？ 你拯救困苦的人脫離許個比伊卡強者， 拯救困苦及喪鄉的人脫離許個搶奪伊者？ |
| 35:11 | 兇惡的干證者起來，
我所知的事𪜶查問我。 |
| 35:12 | 𪜶對佇我用歹報好，
互我的神魂孤單。 |
| 35:13 | 論到我，當𪜶破病的時，
我就穿麻衫，用禁食，刻苦我的心神； 我所求的攏歸佇家己的心懷。 |
| 35:14 | 我按呢行，親像伊是我的朋友，我的兄弟；
我屈落身軀悲哀，親像人為著老母哀傷。 |
| 35:15 | 我抵著患難，𪜶就歡喜，相及聚集。
我所相識的下等人聚集攻擊我； 𪜶搝搙我無息。 |
| 35:16 | 𪜶親像戲謔諞食的無下落人對我咬嘴齒根。
|
| 35:17 | 主啊，你定定啲看欲到偌久？
求你救我的神魂脫離𪜶的殘害！ 救我的生命脫離猛的獅仔！ |
| 35:18 | 我佇大聚會的中間欲感謝你，
佇眾百姓的中間欲謳咾你。 |
| 35:19 | 求你莫得容允許個無理由對敵我的對我誇口！
莫得容允許個無因端怨恨我的眥我。 |
| 35:20 | 因為𪜶無講和平的話，
就是計謀詭譎的話害地上安份的人。 |
| 35:21 | 𪜶大大開嘴攻擊我，講：
呼哉！呼哉！阮的目睭已經看見啦！ |
| 35:22 | 耶和華啊，你已經看見，求你通靜靜！
主啊，通離開我！ |
| 35:23 | 我的上帝我的主啊，求你精神起來，
判決我的事，辦理我的案！ |
| 35:24 | 耶和華──我的上帝啊，求你照你的公義判斷我，
莫得容允𪜶對我誇口！ |
| 35:25 | 莫得容允𪜶心內講：呼哉，照阮的心願啦！
莫得容允𪜶講：阮已經給伊吞落去啦！ |
| 35:26 | 願許個歡喜我抵著患難者攏見誚漏氣！
願許個對我家己尊大者，受見誚落臉！ |
| 35:27 | 願許個愛我得著伸冤的人出歡喜的聲快樂；
願𪜶常常講：著尊耶和華做大！ 因為伊歡喜伊的奴僕平安。 |
| 35:28 | 我的舌欲講起你的義，
通日謳咾你。 |