| 章節 | 台語漢字本聖經 請按此下載安裝Open Han 2024版字型，免得漏掉造字 |
| 17:1 | 大衛的祈禱。 無辜的人的祈禱 耶和華啊，求你聽公義， 留心聽我的求叫！ 我的祈禱是對奸詐的嘴唇出， 求你俯耳孔來聽！ |
| 17:2 | 願我的判詞對你的面前發出；
願你的目睭鑑察正直。 |
| 17:3 | 你已經試驗我的心；
你佇暝時鑑察我； 你鍛煉我，無尋著甚麼； 我立志互我的嘴無有過失。 |
| 17:4 | 論到人的行做，我趁你所講的話家己謹守，
無行強惡人的路。 |
| 17:5 | 我的腳定定行你的路；
我的腳未曾踏趨。 |
| 17:6 | 上帝啊，論到我，我曾求叫你，因為你欲應我；
求你俯耳孔，聽我的話。 |
| 17:7 | 求你顯明你各樣的仁慈；
你是用正手救倚靠你的人脫離許個起來攻擊𪜶者。 |
| 17:8 | 求你保護我，親像保護目睭仁；
將我蓋密佇你的翅下， |
| 17:9 | 互我脫離許個搶劫我的歹人，
就是圍困我欲害我生命的對敵。 |
| 17:10 | 𪜶互家己的油包密；
𪜶的嘴講驕傲的話。 |
| 17:11 | 𪜶現在圍困阮的腳步；
𪜶注目，欲捙倒阮佇地裡。 |
| 17:12 | 𪜶親像獅數想欲咬物，
閣親像猛的獅仔匿佇暗密的所在。 |
| 17:13 | 耶和華啊，求你起來，抵當對敵，將伊打倒！
用你的刀救我的生命脫離歹人。 |
| 17:14 | 耶和華啊，用你的手救我脫離世間人，
脫離許個佇今生有福份的世間人！ 你將你的財寶充滿𪜶的腹肚； 𪜶有子兒到心滿意足， 將其餘的財物留互𪜶的嬰仔。 |
| 17:15 | 論到我，我欲佇義的中間看見你的面；
我睏醒的時，看見你的形容就心滿意足。 |