| 章節 | 台語漢字本聖經 請按此下載安裝Open Han 2024版字型，免得漏掉造字 |
| 43:1 | 約瑟的兄及便雅憫到埃及 彼所在飢荒真大。 |
| 43:2 | 𪜶對埃及帶來的五穀已經食了，𪜶老父給𪜶講：「恁閣去給咱糴淡薄米糧來。」 |
| 43:3 | 猶大應伊講：「彼人切切吩咐阮講：『恁小弟若無及恁相及來，恁就𣍐得著見我的面。』 |
| 43:4 | 你若差阮小弟及阮相及去，阮就落去給你糴米糧； |
| 43:5 | 你若差伊去，阮就落去，因為彼人給阮講：『恁小弟若無及恁相及來，恁就𣍐得著見我的面。』」 |
| 43:6 | 以色列講：「恁啥事按呢害我，給彼人講恁猶有小弟啊？」 |
| 43:7 | 𪜶應講：「彼人致意問阮及阮親族的代誌，講：『恁老父猶佇啲無？恁猶有兄弟無？』阮照伊所問的給伊講。阮豈可會知伊欲講『著帶恁小弟落來』？」 |
| 43:8 | 猶大閣給伊的老父以色列講：「你差囝仔及我去，阮就起身去，通互阮及你，以及阮的囝仔，得著活，免死。 |
| 43:9 | 我給伊保；你通對我討，我若無導伊倒來徛佇你的面前，我願一生擔當罪。 |
| 43:10 | 咱若是有延迁，已經第二擺倒來啦。」 |
| 43:11 | 𪜶老父以色列對𪜶講：「若是按呢，恁就著按呢做：通取此所在第一好的土產乳香淡薄、蜂蜜淡薄、以及香料、沒藥、榧子、杏仁攏收佇器具內，帶去送彼人， |
| 43:12 | 閣著帶銀重倍，亦著將恁布袋口伊還恁的銀帶倒轉去互伊；彼個豈採是失錯。 |
| 43:13 | 亦導恁小弟起身，去閣見彼人。 |
| 43:14 | 獨獨願全能的上帝互恁佇彼人的面前得著憐憫，將恁彼個兄弟及便雅憫交恁。我若失落我的子，亦著互伊失落就是。」 |
| 43:15 | 對彼霎，𪜶帶許個禮物，亦帶銀重倍，閣導便雅憫，起身落去埃及，徛佇約瑟的面前。 |
| 43:16 | 約瑟看見便雅憫及𪜶相及來，就對管家者講：「導諸個人去厝內。刣精牲，備辦筵席，因為日晝諸個人欲及我相及食。」 |
| 43:17 | 彼人就照約瑟的話去行，導𪜶許個人入約瑟的厝。 |
| 43:18 | 許個人因為互伊導到約瑟的厝，就驚惶，講：「導咱到遮，的確是因為頭一擺還咱佇布袋內的銀，欲尋咱的空縫，下手害咱，強強掠咱做奴僕，搶咱的驢。」 |
| 43:19 | 𪜶就倚近約瑟的管家者，佇厝門口及伊講話， |
| 43:20 | 講：「我的主啊，阮頭擺落來實在是欲糴米糧。 |
| 43:21 | 後來到歇暝的所在，開阮的布袋，無拍算，阮逐人的銀足數，猶原佇逐人的布袋口，今阮有閣帶來。 |
| 43:22 | 阮另外有閣帶銀欲來糴米糧。阮知是誰將阮的銀下佇阮的布袋內。」 |
| 43:23 | 管家者講：「做恁安心，免驚；是恁的上帝及恁老父的上帝賞賜恁財寶佇恁的布袋內；恁的銀，我已經收了。」就導西緬出來，互𪜶。 |
| 43:24 | 彼人就導許個人入約瑟的厝，捧水互𪜶，𪜶就洗腳，閣提草料飼𪜶的驢。 |
| 43:25 | 𪜶就備辦許個禮物，聽候約瑟日晝倒來，因為𪜶聽見欲佇遐食。 |
| 43:26 | 約瑟倒來到厝，𪜶就將所帶來的禮物提入厝送伊，閣仆佇地裡，拜伊。 |
| 43:27 | 約瑟問𪜶平安，閣講：「恁的老父──就是恁所講彼個老人平安嗎？伊猶佇啲嗎？」 |
| 43:28 | 𪜶應講：「你的奴僕──阮的老父平安；伊猶佇啲。」𪜶就俯頭拜伊。 |
| 43:29 | 約瑟攑目看見伊同母的小弟便雅憫，就講：「你所給我講煞尾小弟是此個嗎？」閣講：「細子，願上帝施恩互你！」 |
| 43:30 | 約瑟疼小弟的情大受激動，就趕緊尋一位通啼哭，入伊的房間啼哭。 |
| 43:31 | 後來洗面出來，勉強愞啲，吩咐開桌。 |
| 43:32 | 𪜶就為約瑟另外排一塊桌，為許個人閣排一塊，亦為及約瑟相及食的埃及人另外排一塊，因為埃及人𣍐通及希伯來人相及食；這是埃及人所厭惡。 |
| 43:33 | 許個人坐佇伊的面前，大細照𪜶年歲的次序，許個人大家卬愕。 |
| 43:34 | 約瑟將伊面前的食物，分互𪜶；獨獨便雅憫所得著的比別人五倍多。𪜶就飲酒，及約瑟相及宴樂。 |