| 章節 | 台語漢字本聖經 請按此下載安裝Open Han 2024版字型，免得漏掉造字 |
| 7:1 | 哈曼受處死 王及哈曼來赴王后以斯帖的筵席。 |
| 7:2 | 此個第二日王佇酒筵席的中間，閣問以斯帖講：「王后以斯帖啊，你所請是甚麼，欲互你；你所求是甚麼，就國的一半也欲做成伊。」 |
| 7:3 | 王后以斯帖應講：「王啊，我若得著恩典佇你的目睭前，王若掠做好，就願你允我所請，用我的生命互我；允我的所求，用我的宗族互我。 |
| 7:4 | 因為我及我的宗族受賣，欲剿滅刣死阮互阮死無。設使賣阮做奴僕做女婢，雖然對敵𣍐會補王的損失，我也靜靜。」 |
| 7:5 | 亞哈隨魯王應王后以斯帖講：「敢存心做此個事的是是誰？彼人佇叨落！」 |
| 7:6 | 以斯帖講：「仇讎對敵就是此個歹人哈曼！」 哈曼佇王及王后的面前就真驚。 |
| 7:7 | 王大受氣，對酒筵起來入去王宮的花園。哈曼也起來對王后以斯帖求生命，因為看見王決意欲刑罰伊。 |
| 7:8 | 王對王宮的花園倒轉來酒筵的所在，彼時哈曼已經仆落佇以斯帖所佇啲的床，王講：「伊閣佇宮內、佇我的面前欲凌辱王后嗎？」話對王的嘴講出，人就蓋哈曼的面。 |
| 7:9 | 伺候王的太監有一個名叫哈波拿，講：「看啊，哈曼為著末底改徛一個五十肘高的柴架，末底改就是前日用盡忠的話報王的，今彼個架徛佇哈曼的家。」王講：「吊伊佇彼頂面。」 |
| 7:10 | 人就吊哈曼佇伊給末底改所備辦的柴架頂。王的受氣才息。 |