| 章節 | 台語漢字本聖經 請按此下載安裝Open Han 2024版字型，免得漏掉造字 |
| 13:1 | 及外邦人分開 彼日，人讀摩西的冊互百姓聽，抵著冊內有記講，亞捫人及摩押人永遠𣍐得通入上帝的會； |
| 13:2 | 因為𪜶無用食物及水來迎接以色列人，反轉請巴蘭來咒詛𪜶，總是阮的上帝互彼個咒詛變做祝福。 |
| 13:3 | 𪜶聽見律法了後，就對以色列中分開許個雜族的人。 |
| 13:4 | 尼希米的改革 此個代誌以前，管理阮上帝殿內的房間的祭司以利亞實及多比雅結盟， |
| 13:5 | 就為著伊備辦一間大間房，前佇彼間收囥素祭，乳香、器具，及照例供給利未人、唱歌者、顧門者、五穀、新酒，及油的十份一，及歸互祭司舉祭的物。 |
| 13:6 | 當彼時我無佇耶路撒冷；因為巴比倫王亞達設西三十二年，我越去王遐。過幾若日，我對王告假。 |
| 13:7 | 我到耶路撒冷，就知以利亞實為多比雅所行的歹代佇上帝殿的院內為伊備辦一間房。 |
| 13:8 | 我就真迫腹，將多比雅一切的家器攏對房內㧒出去， |
| 13:9 | 我出命令人就清氣許個房間，然後我將上帝殿內的器具及素祭、乳香閣搬入來。 |
| 13:10 | 我也知利未人所應該得著的份額無互𪜶，致到擔當職的利未人及唱歌者逐個倒去𪜶的田園。 |
| 13:11 | 我就出力責備許個官長給𪜶講：「上帝的殿啥事放荒廢啊？」我就聚集利未人，復倒𪜶的原任。 |
| 13:12 | 對按呢猶大的眾人將五穀、新酒，及油的十份一帶入庫房。 |
| 13:13 | 我設立祭司示利米雅、經學士撒督，及利未人毗大雅做庫房的官管理庫房；副官是哈難。哈難是撒刻的子；撒刻是瑪他尼的子。因為看此幾人是盡忠，𪜶的職份是分發物互𪜶的兄弟。 |
| 13:14 | 我的上帝啊，求你因為此個事著紀念我，莫得擦消我為著上帝的殿及其中許個典禮所行的好事。 |
| 13:15 | 當許個日，我佇猶大看見人佇安息日踏酒窟，搬稻稛閣互驢載，閣用酒、葡萄、無花果，及逐樣的擔佇安息日擔入耶路撒冷，我就佇𪜶賣食物彼日責備𪜶。 |
| 13:16 | 閣有推羅人𫢶佇彼中間；帶魚及逐樣的貨物，佇安息日賣互猶大人佇耶路撒冷。 |
| 13:17 | 我就出力責備猶大許個貴族給𪜶講：「恁行此號歹干犯安息日是啥事啊？ |
| 13:18 | 前恁的列祖豈無按呢行，咱的上帝豈無將此個一切的災禍臨到咱及此個城嗎？今恁猶久犯著安息日，互受氣臨到以色列益發傷重！」 |
| 13:19 | 佇安息日前，耶路撒冷城門黃昏的時，我就命令人關門，閣命令安息日未過身通開。我派我幾若個奴僕管理城門，免得有人佇安息日擔甚麼擔入來。 |
| 13:20 | 對按呢生理人及販賣逐項貨物的，一二擺歇暝佇耶路撒冷的城外。 |
| 13:21 | 我就責備𪜶講：「恁啥事歇暝佇城門口啊？若閣按呢，我欲下手掠恁。」對此霎以後，𪜶佇安息日無閣來。 |
| 13:22 | 我命令利未人清氣家己，來顧守城門，互安息日做聖。我的上帝啊，求你因為此個事來紀念我，照你的大慈悲來疼惜我。 |
| 13:23 | 當許個日，我也看見猶大人娶亞實突、亞捫、摩押的查某子做某。 |
| 13:24 | 𪜶的子兒講話，一半講亞實突的話，𣍐曉講猶大的話，所講的就是照逐族的腔。 |
| 13:25 | 我就大大責備𪜶，罵𪜶，拍𪜶幾若人，掇𪜶的頭毛，教𪜶指上帝來咒誓，講，恁通用家己的查某子嫁互𪜶的子，也通為恁的子恁本身娶𪜶的查某子。 |
| 13:26 | 「以色列王所羅門豈是佇此號事犯罪嗎？佇多多國的中間無一個王親像伊，閣得著伊的上帝疼伊，上帝設立伊做以色列全國的王；總是外邦的查某子尚且互伊犯罪。 |
| 13:27 | 按呢，阮豈聽恁行此號大歹，娶外邦的女子干犯咱的上帝嗎？」 |
| 13:28 | 祭司頭以利亞實的孫、耶何耶大的子，有一個是和倫人參巴拉的子婿，我就趕伊離開我。 |
| 13:29 | 我的上帝啊，求你記得𪜶；因為𪜶拍垃墋祭司的職，背祭司利未人的約。 |
| 13:30 | 按呢，我給𪜶除去一切外邦人的款，閣設立祭司及利未人的班，各盡𪜶的職。 |
| 13:31 | 料理定著期燒祭的柴以及起頭熟的土產。我的上帝啊，求你紀念我，賞賜我福氣。 |