| 章節 | 台語漢字本聖經 請按此下載安裝Open Han 2024版字型，免得漏掉造字 |
| 6:1 | 對敵尼希米的陰謀 參巴拉、多比雅、亞拉伯人基善及阮其餘的對敵聽見我城牆已經起好，其中無留一隙（彼時我卻未有安門扇）， |
| 6:2 | 參巴拉及基善就差人來見我，講：「請你來，咱佇阿羅平洋一個鄉社相會。」總是𪜶想欲害我。 |
| 6:3 | 我就差使者去見𪜶，講：「我今啲辦理大的工，𣍐會落去。豈可會離開伊落去見恁互此個工停止啊？」 |
| 6:4 | 𪜶按呢四擺差人來見我，我攏按呢應𪜶。 |
| 6:5 | 參巴拉第五擺就差伊的奴僕來見我，手提露封的批， |
| 6:6 | 批內寫講：「外邦中有風聲，迦施慕也講，你及猶大人啲謀反，所以你起城牆，你欲做𪜶的王照諸個話； |
| 6:7 | 你閣派先知佇耶路撒冷宣傳你的代誌講，佇猶大有王。今欲照諸個話奏王；所以請你來，咱相及議論。」 |
| 6:8 | 我就差人去見伊，講：「你所講此個事，一概無影，是你的心捏造的。」 |
| 6:9 | 因為𪜶攏愛互阮驚，意思講，𪜶的手欲酸軟，致到工做無成。上帝啊，求你堅固我的手。 |
| 6:10 | 後來我到米希大別的孫、第來雅的子示瑪雅的厝；彼時，伊關啲無出來。伊講：「咱著佇上帝的厝相會，佇殿裡關殿門；因為𪜶欲來刣你，就是佇暝時欲來刣你。」 |
| 6:11 | 我講：「親像我此號人豈通走嗎？親像我此號人豈通入殿來保全生命嗎？我入去！」 |
| 6:12 | 我看出知上帝無差伊，是伊家己講此個先知話來攻擊我，是多比雅及參巴拉賄賂伊。 |
| 6:13 | 賄賂的緣故，是欲互我驚，互我按呢行來犯罪，𪜶通報揚歹話來誹謗我。 |
| 6:14 | 我的上帝啊，多比雅、參巴拉、女先知羅亞底，及其餘許個先知攏是欲互我驚的，求你照𪜶的所行來記得𪜶。 |
| 6:15 | 工程結束 以祿月二十五日，城牆已經起好，共五十二日。 |
| 6:16 | 阮一切的對敵聽見、四圍的外邦人攏驚，家己看是失敗；因為看見此個工做成是出佇咱的上帝。 |
| 6:17 | 當許個日，猶大的貴族沓沓寄批互多比雅，多比雅也用批互𪜶。 |
| 6:18 | 因為佇猶大有多多人及伊結盟；因為伊是亞拉的子，示迦尼的子婿，閣伊的子約哈難娶比利迦的子米書蘭的查某子做某。 |
| 6:19 | 𪜶常常佇我的面前講起伊的好所行，也將我的話傳互伊。多比雅閣常常寄批互我，欲互我驚。 |