| 章節 | 台語漢字本聖經 請按此下載安裝Open Han 2024版字型，免得漏掉造字 |
| 1:1 | 尼希米關心耶路撒冷 哈迦利亞的子尼希米的記錄： 當二十年基斯流月，我佇書珊的王宮。 |
| 1:2 | 彼時，我的兄弟一人名叫哈拿尼，及幾若個猶大人來。我對𪜶問到許個逃脫的猶大人，就是受掠的中間所剩的及耶路撒冷的事情。 |
| 1:3 | 𪜶給我講：「許個受掠的倒來所剩留啲的人佇省內抵著大患難，受凌辱；閣耶路撒冷的城牆拆毀，城門互火燒燎去。」 |
| 1:4 | 我聽見諸個話，就坐啲啼哭悲哀幾若日，禁食祈禱佇天頂的上帝的面前，講： |
| 1:5 | 「天頂的上帝──耶和華，至大通驚畏的上帝啊，守約行仁愛佇疼伊、遵趁伊的誡命者。 |
| 1:6 | 我今求你，願你耳孔聽，目睭看，聽你的奴僕此霎日暝為你的奴僕以色列人來祈禱佇你面前的祈禱，認以色列人的罪就是阮所得罪你的；我及我的老父的家攏有罪。 |
| 1:7 | 阮對你所行的盡在腐敗，無遵守你託你的奴僕摩西所命令的誡命、律例、法度。 |
| 1:8 | 求你記得你所命令你的奴僕摩西的話，講：『恁若犯罪，我就欲四散恁佇列國中； |
| 1:9 | 總是恁若歸佇我，守我的誡命來行伊，就恁受趕逐的人雖然佇天邊，我也欲對遐聚集𪜶，導𪜶到我所揀欲安置我的名的所在。』 |
| 1:10 | 今諸個攏是你的奴僕、你的百姓，就是你用你的大氣力及大權能的手所救贖的。 |
| 1:11 | 主啊，求你俯耳孔聽你的奴僕的祈禱，及許個意愛歡喜敬畏你的名許個奴僕的祈禱，閣求你互你的奴僕今仔日亨通，佇此人的面前得著恩典。」 彼時我做王的酒政。 |