| 章節 | 台語漢字本聖經 請按此下載安裝Open Han 2024版字型，免得漏掉造字 |
| 40:1 | 約瑟為囚犯解夢 諸個代誌以後，埃及王的酒政及廚房得罪𪜶的主──埃及王， |
| 40:2 | 法老受氣伊二個人臣就是酒政長及廚房長， |
| 40:3 | 將𪜶關佇侍衛長府內的監，就是約瑟受關的所在。 |
| 40:4 | 侍衛長將𪜶交代約瑟，伊就伺候𪜶；𪜶就佇監內有許久。 |
| 40:5 | 受關佇監的埃及王的酒政及廚房二人同一暝各夢見一個夢，攏照逐個夢的意義來夢。 |
| 40:6 | 到天光，約瑟入去𪜶遐，看見𪜶有憂悶的款式。 |
| 40:7 | 伊就問法老二個人臣，就是及伊平平關佇主人府內者，講：「今仔日恁啥事面帶憂容？」 |
| 40:8 | 𪜶給伊講：「阮逐人夢見一個夢，無人通圓。」約瑟給𪜶講：「圓夢豈是在佇上帝嗎？請恁給我講。」 |
| 40:9 | 酒政就對約瑟排列伊的夢講：「我夢中看見有一欉葡萄樹佇我的面前， |
| 40:10 | 樹頂有三枝，親像有發芽開花，伊的葩結成熟的葡萄。 |
| 40:11 | 法老的杯佇我的手內，我就提葡萄勒伊佇法老的杯內，將杯捧交法老的手。」 |
| 40:12 | 約瑟給伊講：「你的夢是按呢圓：三枝就是三日； |
| 40:13 | 閣三日，法老欲舉起你的頭，復倒你的官職，法老的酒杯欲猶原下佇你的手，親像前做伊的酒政一樣。 |
| 40:14 | 你若得志的時，著記念我，施恩互我，佇法老的面前替我講一聲，救我出此個監， |
| 40:15 | 我實在是對希伯來人的地受賣來的；我佇遮亦無做出甚麼；互𪜶給我關落監。」 |
| 40:16 | 廚房看見夢圓了好，就給約瑟講：「我亦佇我的夢中看佇我的頭殼頂有三筐煏的餅； |
| 40:17 | 頂面彼筐有貯法老所食逐號煏的物，有鳥來啄我頭殼頂筐內的物。」 |
| 40:18 | 約瑟應伊講：「你的夢是按呢圓：三奇筐是三日； |
| 40:19 | 閣三日，法老欲舉起你的頭殼離開你，吊你佇柴裡，欲有飛鳥來啄你身軀的肉。」 |
| 40:20 | 到第三日，是法老的生日，伊為眾人臣排設筵席，佇諸個人臣的中間，抬舉酒政及廚房， |
| 40:21 | 互酒政長復倒官職，伊猶原捧杯佇法老的手； |
| 40:22 | 總是將廚房頭吊起來，抵抵照約瑟所給𪜶圓的。 |
| 40:23 | 若是酒政長無念著約瑟，竟然𣍐記得伊。 |