| 章節 | 台語漢字本聖經 請按此下載安裝Open Han 2024版字型，免得漏掉造字 |
| 16:1 | 猶大及以色列交戰 ( 王上 15:17-22 ) 亞撒王三十六年，以色列王巴沙上來攻擊猶大，起拉瑪，欲阻擋人出入佇猶大王亞撒遐。 |
| 16:2 | 亞撒就對耶和華的殿及王宮的府庫提出金銀，送互徛起佇大馬色的亞蘭王便‧哈達，講： |
| 16:3 | 「我及你有約，親像前我的老父及你的老父一樣。今我用金銀送你，請你去廢無你及以色列王巴沙所立的約，互伊離開我。」 |
| 16:4 | 便‧哈達聽趁亞撒王的話，差伊許個軍長去攻擊以色列的城。𪜶就攻破以雲、但、亞伯‧瑪音，以及拿弗他利一切府庫的城。 |
| 16:5 | 巴沙聽見就停工，無閣起拉瑪。 |
| 16:6 | 對按呢亞撒王導猶大眾人，𪜶就搬徙巴沙所用來起拉瑪的石頭及柴，用伊來起迦巴及米斯巴。 |
| 16:7 | 先知哈拿尼 彼時，先見哈拿尼來見猶大王亞撒，給伊講：「因為你倚靠亞蘭王，無倚靠耶和華──你的上帝，所以亞蘭王的軍兵脫離你的手。 |
| 16:8 | 古實人及路比人豈是大的軍隊？有多多戰車及馬兵嗎？獨獨因為你倚靠耶和華，伊就將𪜶交佇你的手。 |
| 16:9 | 因為耶和華的目睭佇全地看來看去，見若專心向伊的，伊欲顯明伊的大氣力幫助伊。佇此個代誌你所行是戇；因為按呢，以後你欲有交戰的事。」 |
| 16:10 | 亞撒就受氣先見，關伊佇監裡。因為伊為著此件事大受氣。彼時亞撒也歹款待百姓中幾若人。 |
| 16:11 | 亞撒死 ( 王上 15:23-24 ) 亞撒所行的事，對頭到尾攏記佇猶大及以色列諸個王的記錄。 |
| 16:12 | 亞撒王三十九年，伊的腳有破病，病真傷重。破病的時無求耶和華，獨獨去求醫生。 |
| 16:13 | 亞撒做王四十一年就死，及伊的列祖相及睏， |
| 16:14 | 埋葬佇伊家己的墓就是伊佇大衛的城為家己所鑿的，下佇眠床裡，伊的眠床有芳香滿滿，就是照調和香的法所創的，百姓為著伊行多多燒的禮數。 |