| 章節 | 台語漢字本聖經 請按此下載安裝Open Han 2024版字型，免得漏掉造字 |
| 9:1 | 示巴女王訪問所羅門 ( 王上 10:1-13 ) 示巴的女王聽見所羅門的名聲，就到耶路撒冷，欲用得解明的事試所羅門；隨伊的人真多，有駱駝載香料，及黃金真多，也有寶石。伊見所羅門的時，就將心內一切所存的及伊講。 |
| 9:2 | 所羅門照伊所問的攏應伊，無一項所羅門𣍐曉得通給伊講。 |
| 9:3 | 示巴女王看見所羅門的智慧及伊所起的厝， |
| 9:4 | 桌頂的食物，人臣排列啲坐，奴僕跟隨服事，以及𪜶的衣服，及伊的酒政以及𪜶的衣服，閣看見伊上耶和華殿的崎仔，就魂不附體， |
| 9:5 | 伊對王講：「我佇本國聽見你的代誌及你的智慧攏是真實！ |
| 9:6 | 總是我信𪜶的話，到我來親目看，看啊，你的智慧的大；人所給我講的，猶無一半；你贏過我所聽見的名聲。 |
| 9:7 | 福氣啊，你的人，福氣啊，你的奴僕，常常徛佇你的面前聽你的智慧。 |
| 9:8 | 耶和華──你的上帝是應該謳咾的！伊歡喜你，互你坐伊的位，通為著耶和華──你的上帝做王；因為你的上帝疼以色列，愛永遠堅固伊，所以設立你做𪜶的王，互你秉公行義。」 |
| 9:9 | 女王用一百二十他連得的金，及多多香料及寶石送王；未曾有香料親像示巴女王送所羅門王的。 |
| 9:10 | 希蘭的奴僕及所羅門的奴僕對俄斐帶金來的，閣帶檀香柴及寶石來。 |
| 9:11 | 王用檀香柴為耶和華的殿及王宮做欄杆，閣為唱歌的人做琴及瑟；佇猶大地前未曾看見親像此號。 |
| 9:12 | 所羅門王佇示巴女王所帶來送王的以外，閣照伊一切所愛所求的，攏互伊。對按呢女王及伊的人臣倒轉去伊的本國。 |
| 9:13 | 所羅門的財富 ( 王上 10:14-25 ) 所羅門逐年所得著的金共六百六十六他連得， |
| 9:14 | 以外猶有生理人及客商所帶來的，閣亞拉伯列王以及國內的首領攏帶金銀來互所羅門。 |
| 9:15 | 所羅門王用過拍的金做大牌二百面，每面大牌的金六百舍客勒； |
| 9:16 | 閣用過拍的金做屏牌三百面，每面用金三百舍客勒，王下伊佇黎巴嫩樹林的厝。 |
| 9:17 | 王閣用象牙做一個大寶座，用好金安伊。 |
| 9:18 | 寶座有六層的崎仔，閣有金的腳踏椅，及寶座相連。雙旁有靠手，靠手邊有二隻獅徛啲。 |
| 9:19 | 閣有十二隻獅徛佇六層崎仔的此旁及彼旁；別國攏無製造親像按呢。 |
| 9:20 | 所羅門王一切飲的器具攏是金的，黎巴嫩樹林的厝一切的器具也是好金的。所羅門的年間，人看銀做無物。 |
| 9:21 | 因為王的船隻及希蘭的奴僕相及去他施；諸個他施的船載金、銀、象牙、猴、孔雀，三年倒來一擺。 |
| 9:22 | 所羅門王的好額及智慧贏過天下列王。 |
| 9:23 | 天下列王攏來愛見所羅門的面，聽伊的智慧就是上帝賞賜佇伊的心的。 |
| 9:24 | 𪜶逐個帶進貢的物，就是銀器、金器、衣服、軍器、香料，馬及騾，逐年有定著的例。 |
| 9:25 | 所羅門為著馬及車有馬四千，閣有馬兵一萬二千，安置𪜶佇許個囤車的城也及王佇耶路撒冷。 |
| 9:26 | 所羅門管轄列王，對大河到非利士地，到埃及的交界。 |
| 9:27 | 王佇耶路撒冷互銀做親像石頭，互柏香樹親像平洋的桑材樹，是因為真多。 |
| 9:28 | 有人帶馬對埃及對逐所在來互所羅門。 |
| 9:29 | 所羅門政績簡述 ( 王上 11:41-43 ) 所羅門其餘的事，對頭到尾，豈無記佇先知拿單的冊及示羅人亞希雅先知的冊，及先見易多默示的冊，論尼八的子耶羅波安的嗎？ |
| 9:30 | 所羅門佇耶路撒冷做以色列全國的王共四十年。 |
| 9:31 | 所羅門及伊的列祖同睏，埋葬佇伊的老父大衛的城。伊的子羅波安續接伊做王。 |