| 章節 | 台語漢字本聖經 請按此下載安裝Open Han 2024版字型，免得漏掉造字 |
| 3:1 | 所羅門動工起耶和華的殿佇耶路撒冷、摩利亞的山，就是耶和華對伊的老父大衛出現的所在，大衛曾定著彼個地佇耶布斯人阿珥楠的五穀場。 |
| 3:2 | 所羅門坐位第四年二月初二動工來起。 |
| 3:3 | 所羅門所下的地基欲起上帝的殿的，記佇下底：長六十肘，闊二十肘，攏是照古早的寸尺。 |
| 3:4 | 頭前的廊長二十肘，及殿的闊平平，高一百二十肘；內面安好金。 |
| 3:5 | 大間殿的壁用松樹的柴蓋伊，用好金安伊，頂面刻棗樹及鍊仔； |
| 3:6 | 用寶石鑲彼間殿，互伊真媠；所用的金攏是巴瓦音的金。 |
| 3:7 | 閣用金安殿及棟樑，戶椗、牆壁、門扇；壁頂刻𠼻𡀔兵。 |
| 3:8 | 閣起至聖所，長二十肘，及殿的闊平平，伊的闊也是二十肘；用好金安，計共六百他連得。 |
| 3:9 | 釘的金釘重五十舍客勒。樓閣攏安金。 |
| 3:10 | 至聖所的內面照做像的法創二個𠼻𡀔兵，用金安伊。 |
| 3:11 | 許個𠼻𡀔兵的翅共長二十肘。此個𠼻𡀔兵一支翅長五肘，伸到殿此旁的壁；彼支翅也是五肘，伸到彼個𠼻𡀔兵的翅。 |
| 3:12 | 彼個𠼻𡀔兵一支翅也是五肘，伸到殿彼旁的壁；彼支翅也是五肘，及此個𠼻𡀔兵的翅相接。 |
| 3:13 | 許個𠼻𡀔兵展開翅，共二十肘，𪜶的腳啲徛，面向內面。 |
| 3:14 | 閣用藍色、紫色、朱紅色的料及幼苧布做帳；綉𠼻𡀔兵佇伊的頂面。 |
| 3:15 | 二支銅柱 ( 王上 7:15-22 ) 佇殿前創二支柱，高三十五肘；每支柱的柱枓高五肘。 |
| 3:16 | 閣做鍊仔，安佇柱枓；閣做石榴一百粒，安佇鍊仔頂。 |
| 3:17 | 許個柱祀佇殿前，一支佇正旁，一支佇倒旁；正旁的號名叫雅斤，倒旁的號名叫波阿斯。 |