| 章節 | 台語漢字本聖經 請按此下載安裝Open Han 2024版字型，免得漏掉造字 |
| 5:1 | 流便的後裔 以色列的大子流便；伊本是大子，因為伊拍垃墋伊的老父的眠床，所以大子的名份就歸佇以色列的子約瑟的後裔。獨獨世系無照大子的例來算。 |
| 5:2 | 因為猶大贏過伊攏總的兄弟，君王也是對伊出；總是大子的名份歸佇約瑟。 |
| 5:3 | 以色列的大子流便的子哈諾、法路、希斯倫、迦米。 |
| 5:4 | 約珥的子示瑪雅；示瑪雅的子歌革；歌革的子示每； |
| 5:5 | 示每的子米迦；米迦的子利亞雅；利亞雅的子巴力； |
| 5:6 | 巴力的子備拉。此個備拉做流便支派的首領，互亞述王提革拉‧毗尼色掠去。 |
| 5:7 | 伊的兄弟照宗族，照世系的族譜做族長的是耶利、撒迦利雅、比拉。 |
| 5:8 | 比拉是亞撒的子；亞撒是示瑪的子；示瑪是約珥的子；約珥所徛起的地方就是亞羅珥到尼波及巴力‧冕， |
| 5:9 | 閣對東續到伯拉河此旁的曠野，因為𪜶佇基列的地𪜶的精牲真多。 |
| 5:10 | 掃羅的時，𪜶及夏甲人交戰，夏甲人死佇𪜶的手下，𪜶就佇基列東勢的全地，徛起佇𪜶的布棚。 |
| 5:11 | 迦得的後裔 迦得的子孫佇流便的對面徛起，佇巴珊的地，到佇撒迦。 |
| 5:12 | 𪜶中間做族長的約珥，有做副族長的沙番，閣有雅乃及徛起佇巴珊的沙法。 |
| 5:13 | 𪜶宗族的兄弟米加勒、米書蘭、示巴、約賴、雅干、細亞、希伯，共七人。 |
| 5:14 | 諸個攏是亞比孩的子。亞比孩是戶利的子；戶利是耶羅亞的子；耶羅亞是基列的子；基列是米迦勒的子；米迦勒是耶示篩的子；耶示篩是耶哈多的子；耶哈多是布斯的子。 |
| 5:15 | 閣有古尼的孫、押比疊的子亞希。諸個攏是做族長的。 |
| 5:16 | 𪜶徛起佇基列及巴珊及伊的鄉里，以及沙崙的郊野，直到四圍的交界。 |
| 5:17 | 諸個人佇猶大王約坦的時，及以色列王耶羅波安的時，攏記佇𪜶的世系的族譜。 |
| 5:18 | 流便迦得瑪拿西族的軍隊 流便人、迦得人，及瑪拿西半支派的人，會捾盾牌攑刀、開弓射箭、出征𠢕相刣的勇士共有四萬四千七百六十人。 |
| 5:19 | 𪜶及夏甲人、伊突人、拿非施人、羅答人交戰。 |
| 5:20 | 𪜶得著幫助，夏甲人及跟隨𪜶的人攏交佇𪜶的手；因為𪜶佇戰陣的中間求叫上帝，因為𪜶倚靠上帝，伊就聽𪜶。 |
| 5:21 | 𪜶搶掠夏甲人的精牲，有駱駝五萬隻，羊二十五萬隻，驢二千隻；閣有人十萬。 |
| 5:22 | 對敵死的真多，因為此個交戰是對上帝。𪜶就住佇對敵的地，到𪜶受掠的時。 |
| 5:23 | 瑪拿西半支派 瑪拿西半支派的人徛起佇彼個所在。對巴珊續到巴力‧黑們、示尼珥及黑門山。 |
| 5:24 | 𪜶的族長就是以弗、以示、以列、亞斯列、耶利米、何達威雅、雅疊，攏是大權能的勇士，有名聲的人，也是做族長的。 |
| 5:25 | 二支派人悖逆上帝 𪜶得罪𪜶列祖的上帝，趁彼所在的百姓的上帝行邪淫；諸個百姓就是上帝佇𪜶的面前所除滅的。 |
| 5:26 | 所以，以色列的上帝激動亞述王普勒及亞述王提革拉‧毗尼色的心，伊將流便人、迦得人、瑪拿西半支派的人，掠到哈臘、哈博、哈拉及歌散的河，到今仔日。 |