| 章節 | 台語漢字本聖經 請按此下載安裝Open Han 2024版字型，免得漏掉造字 |
| 35:1 | 上帝佇伯特利賜福雅各 上帝給雅各講：「去啊！上去伯特利，住佇遐；閣著佇遐給上帝起一座壇，就是你閃避你的兄以掃的面的時對你出現的彼個。」 |
| 35:2 | 雅各就給全家以及一切及伊佇啲的人講：「恁著除去恁中間外邦的上帝，亦著家己清氣，換恁的衣裳。 |
| 35:3 | 咱著起來，上去伯特利，佇遐我欲給上帝起一座壇，就是佇我抵著患難的日允准我的祈禱、佇我所行的路及我佇啲彼個。」 |
| 35:4 | 𪜶就將𪜶手內所有異邦的神明及𪜶的耳鈎攏互雅各；雅各將許個埋佇示劍彼位的橡樹腳。 |
| 35:5 | 𪜶就起身。上帝互四周圍的城的人攏真驚，𪜶就無追趇雅各的眾子。 |
| 35:6 | 雅各以及一切及伊做陣的人到迦南地的路斯，就是伯特利。 |
| 35:7 | 伊佇遐起一座壇，就給彼所在號名叫伊勒‧伯特利；因為伊閃避伊的兄的時，上帝佇遐對伊出現。 |
| 35:8 | 利百加的奶母底波拉死，就埋葬佇伯特利的下面橡樹腳；所以叫伊的名亞倫‧巴古。 |
| 35:9 | 雅各對巴旦‧亞蘭倒來，上帝閣對伊出現，賜福互伊， |
| 35:10 | 上帝閣給伊講：「你名是雅各，今以後你的名無閣叫雅各，欲名叫以色列。」就叫伊的名以色列。 |
| 35:11 | 上帝閣給伊講：「我是全能的上帝；你著生湠多多，將來有一國閣有多多國對你來生，閣有君王對你生出。 |
| 35:12 | 我所互亞伯拉罕及以撒的地，我欲互你亦欲將此個地互你的後裔。」 |
| 35:13 | 上帝就對及伊講話的所在上去。 |
| 35:14 | 雅各就佇上帝及伊講話的所在徛一支柱，就是石柱，佇彼頂面灌奠，倒油。 |
| 35:15 | 雅各就稱上帝及伊講話的所在名做伯特利。 |
| 35:16 | 拉結去世 𪜶對伯特利起身，離開以法他猶有一站的路，拉結得欲生，臨產艱難。 |
| 35:17 | 當伊艱苦生的時，拾姐對伊講：「免驚，你今欲閣得著一個子。」 |
| 35:18 | 伊氣欲斷臨終的時，就叫伊的子的名便‧俄尼；伊的老父給伊號名便雅憫。 |
| 35:19 | 拉結死，埋葬佇去以法他的路；以法他就是伯利恆。 |
| 35:20 | 雅各徛柱佇伊的墓頂，此個柱就是拉結的墓牌，到今仔日猶佇啲。 |
| 35:21 | 以色列閣起身去，佇以得台搭布棚。 |
| 35:22 | 雅各的子 ( 代上 2:1-2 ) 以色列住佇彼所在的時，流便去及伊的老父的細姨辟拉相及睏，以色列亦聽。 雅各共有十二個子。 |
| 35:23 | 利亞的子就是雅各的大子流便，以及西緬、利未、猶大、以薩迦、西布倫。 |
| 35:24 | 拉結的子就是約瑟、便雅憫。 |
| 35:25 | 拉結的女婢辟拉所生的子就是但及拿弗他利。 |
| 35:26 | 利亞的女婢悉帕所生的子迦得、亞設。這是雅各佇巴旦‧亞蘭所生的子。 |
| 35:27 | 以撒去世 雅各來見伊的老父以撒，佇幔利到基列‧亞巴，就是希伯崙；亞伯拉罕及以撒曾寄居的所在。 |
| 35:28 | 以撒享壽一百八十歲。 |
| 35:29 | 以撒年歲老，日子滿足，氣斷來死，倒去伊的列祖遐。伊二個子以掃、雅各給伊埋葬。 |