| 章節 | 台語漢字本聖經 請按此下載安裝Open Han 2024版字型，免得漏掉造字 |
| 25:1 | 耶路撒冷陷落 ( 代下 36:13-21 耶 52:3-11 ) 西底家背叛巴比倫王。當伊坐位第九年十月初十，巴比倫王尼布甲尼撒導伊全軍來攻擊耶路撒冷，佇城的對面紮營，閣佇四圍築土堆攻擊城。 |
| 25:2 | 對按呢城受圍困，直到西底家王十一年。 |
| 25:3 | 四月初九日，城內飢荒真傷重，致到彼所在的百姓攏無米糧。 |
| 25:4 | 城受攻破，一切的兵丁透暝對倚近王的園二個城牆中的門彼條路逃走。迦勒底人抵抵佇四圍攻擊城，王就對亞拉巴的路逃走。 |
| 25:5 | 迦勒底的軍兵追趇王，佇耶利哥的平洋追著伊；伊的全軍攏離開伊四散。 |
| 25:6 | 𪜶掠著王，帶到利比拉巴比倫王遐，就審判伊。 |
| 25:7 | 佇西底家的目睭前刣死西底家許個子，閣挖西底家二蕊目睭，用鐵鍊鍊伊，帶伊到巴比倫。 |
| 25:8 | 聖殿受毀 ( 耶 52:12-33 ) 巴比倫王尼布甲尼撒王十九年五月初七日，跟隨巴比倫王的侍衛長尼布撒拉旦到耶路撒冷， |
| 25:9 | 用火燒耶和華的殿及王宮，閣用火燒耶路撒冷一切的厝，就是富貴家的厝。 |
| 25:10 | 跟隨侍衛長迦勒底的全軍就拆毀耶路撒冷四圍的城牆。 |
| 25:11 | 彼時侍衛長尼布撒拉旦將留佇城內所剩的百姓，及許個投降巴比倫王的，以及眾人中所剩的，攏掠去。 |
| 25:12 | 獨獨侍衛長留第一喪鄉的，互𪜶治理葡萄園，及種作。 |
| 25:13 | 耶和華殿內的銅柱，及耶和華殿內的盆座以及銅海，迦勒底人攏拍破，將許個銅運到巴比倫， |
| 25:14 | 閣帶去鼎、托仔、剪刀、碗，及所用一切的銅器， |
| 25:15 | 火爐、盤，一切金器的金銀器的銀，侍衛長攏帶去。 |
| 25:16 | 閣帶所羅門王為耶和華的殿所創二支柱、一個銅海，及許個座，諸個器具的銅𣍐會秤伊的輕重。 |
| 25:17 | 此支柱高十八肘，伊的頂面有銅的柱枓，柱枓高三肘；柱枓的周圍有網仔及石榴，攏是銅做的。第二支柱，像一款，也有網仔。 |
| 25:18 | 猶大人受掠 ( 耶 52:24-27 ) 侍衛長掠祭司頭西萊雅、及第二級的祭司西番亞，及三個顧門者， |
| 25:19 | 閣對城內掠一個管兵的官，及佇城內所抵著常常見王的面的五人及軍長的書記點算百姓的，以及城中所抵著的國民六十人。 |
| 25:20 | 侍衛長尼布撒拉旦將諸個人帶到利比拉巴比倫王遐。 |
| 25:21 | 巴比倫王拍𪜶佇哈馬地的利比拉刣死𪜶。按呢，猶大的百姓受掠離開本地。 |
| 25:22 | 立基大利做猶大省長 ( 耶 40:7-9 41:1-3 ) 論到猶大國剩的百姓，就是巴比倫王尼布甲尼撒所留的，王設立沙番的孫、亞希甘的子基大利管轄𪜶。 |
| 25:23 | 眾軍長及屬𪜶的人聽見巴比倫王設立基大利管轄𪜶，對按呢尼探雅的子以實瑪利、加利亞的子約哈難、尼陀法的人單戶蔑的子西萊雅、瑪迦人的子雅撒尼亞，及屬𪜶的人攏到米斯巴見基大利。 |
| 25:24 | 基大利對𪜶及屬𪜶的人咒誓講：「恁莫得驚迦勒底的人臣，做恁𫢶此所在服事巴比倫王，就通得著福氣。」 |
| 25:25 | 七月間，王親以利沙瑪的孫、尼探雅的子以實瑪利帶十人及伊來，拍死基大利以及及伊佇米斯巴的猶大人及迦勒底人。 |
| 25:26 | 對按呢眾百姓，無論大細，及許個軍長；攏起來去埃及，因為驚迦勒底人的緣故。 |
| 25:27 | 約雅斤受解放 ( 耶 52:31-34 ) 猶大王約雅斤受掠了後第三十七年，巴比倫王以未‧米羅達元年十二月二十七日，舉起猶大王約雅斤，放伊出監； |
| 25:28 | 亦用好話安慰伊，互伊的位卡高其餘諸個王的位，就是及伊同佇巴比倫的。 |
| 25:29 | 褪去伊監內所穿的衫。一世人及巴比倫王相及食。 |
| 25:30 | 巴比倫王賞賜伊所欠用的食物，日日互伊一份，一世人攏是按呢。 |