上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
利未記
遵行誡命受祝福
26:1 ( 申 7:12-24 28:1-14 )
毋通為家己造任何神像，毋通𫞼雕刻的偶像抑是柱像，嘛毋通佇恁的境內安石像跪拜。我是上主 — 恁的上帝。
26:2 恁著守我的安歇日，敬重我的聖所。我是上主。
26:3 恁若切實遵行我的規例及誡命，
26:4 我會照時給恁落雨，互土地生產，互田野的樹木結果子。
26:5 恁收成五穀欲收到挽葡萄的時，挽葡萄欲挽到撒種的時；閣恁會有米糧食到飽，佇恁的土地安居樂業。
26:6 我欲互恁四境平安；恁倒啲睏，無人給恁嚇驚。我欲將兇惡的野獸對恁的地趕走，閣互恁𣍐抵著戰亂。
26:7 恁欲給對敵趕走；𪜶欲死佇恁的刀下。
26:8 恁五個人欲趕走一百個，一百個人欲趕走一萬個；對敵欲死佇恁的刀下。
26:9 我欲看顧恁，互恁生湠真多，嘛欲堅立及恁立的約。
26:10 恁舊的米糧食猶未了，就著給伊徙走來收囥新的糧食。
26:11 我欲佇恁中間建立我的會幕，我𣍐厭惡恁。
26:12 我欲不時及恁同在。我欲做恁的上帝，恁欲做我的子民。
26:13 我是上主 — 恁的上帝，有導恁出埃及地，互恁無閣做埃及人的奴隸。我曾摃斷恁的軛，互恁攑頭挺身向前行。
違反誡命受刑罰
26:14 ( 申 28:15-68 )
恁若毋聽趁我的話，無遵守我的誡命，
26:15 棄拺我的規例，厭惡我的命令，無欲實行我攏總的誡命，違背我的約，
26:16 我就欲按呢對待恁：我一定欲互恁驚惶，著肺癆、熱病，致到失明，人衰荏；恁撒種無採工，對敵會給恁的收成食了了。
26:17 我欲對恁變面，互對敵給恁拍敗，互怨恨恁的給恁管轄；無人給恁趇，恁嘛欲逃走。
26:18 恁抵著諸個代誌若猶久毋聽趁我的話，我就欲照恁的罪七倍責罰恁。
26:19 我欲將恁誇口的勢力拍碎，閣欲互恁的天親像鐵𣍐落雨，地親像銅𣍐當種作。
26:20 恁的勞苦著磨攏欲落空，因為恁的土地𣍐生產，樹木𣍐結果子。
26:21 恁行踏若及我作對，毋聽趁我，我就欲照恁的罪降七倍災禍互恁。
26:22 我欲放野獸去恁遐，咬死恁的子兒，吞食恁的牲生，互恁的人口減少，路荒廢。
26:23 按呢恁若猶毋受教來歸向我，行踏及我作對，
26:24 我嘛欲及恁作對，欲照恁的罪七倍打擊恁。
26:25 我欲互恁抵著戰亂，報應恁背約的罪。恁若匿佇城內，我欲降瘟疫互恁，閣將恁交互對敵。
26:26 我無欲閣供給米糧互恁；彼時十個婦仁人欲公家用一個烘爐烘餅，照配給分互恁；恁食，毋拘食𣍐飽。
26:27 經過諸個代誌，恁若猶毋聽趁我，行踏猶久及我作對，
26:28 我就欲發大受氣，及恁作對，欲閣照恁的罪加七倍打擊恁。
26:29 恁會枵甲食恁的子查某子的肉。
26:30 我欲毀壞恁的山頭壇，破壞恁的香壇，將恁的身屍㧒佇受毀壞的偶像頂面；我嘛欲厭惡恁。
26:31 我欲互恁的城拋荒，互恁的聖所荒廢；我無欲鼻恁的祭物的芳味。
26:32 我欲互恁的地荒廢，給恁佔領的對敵欲因為按呢著驚。
26:33 我欲將恁趕散去列國，嘛欲拔刀追趕恁；互恁的地荒廢，互恁的城拋荒。
26:34 恁流亡去列國的時，恁的土地欲因為拋荒得著安歇。
26:35 按呢，土地就完全歇睏，享受恁住佇遐的時無互伊的安歇。
26:36 恁中間所賰的人，我欲互𪜶佇對敵的土地心內驚惶；連樹葉互風吹振動的聲，嘛會互𪜶驚甲逃走。無人給𪜶趇，𪜶嘛會親像啲逃閃刀劍，走甲跋倒。
26:37 無人給𪜶追趕，𪜶嘛會相揢跋倒，親像人欲給𪜶刣；恁會互對敵完全拍敗。
26:38 恁會對列國的中間消失，互對敵的地吞滅。
26:39 恁住佇對敵的地賰落來的人，會因為家己及祖先的罪衰微。
26:40 毋拘𪜶若認家己及祖先的罪，就是承認𪜶有背叛我，及我作對，
26:41 致到我及𪜶作對，互𪜶受掠去對敵的地；彼時𪜶驕傲固執的心若謙卑落來，甘願受刑罰，
26:42 我就會想著我及亞伯拉罕、以撒、雅各所立的約，嘛會不時想著彼塊土地。
26:43 𪜶放拺彼塊土地，彼塊地顛倒佇拋荒的中間享受安歇。𪜶甘願為著家己的罪受刑罰，因為𪜶棄拺我的命令，厭惡我的規例。
26:44 毋拘，𪜶互對敵掠去的時，我猶久無放拺𪜶，厭惡𪜶，給𪜶完全消滅，致到違背我家己及𪜶立的約；因為我是上主 — 𪜶的上帝。
26:45 我欲永遠會記得我及𪜶的祖先所立的約。為著欲做𪜶的上帝，我互外族人親目看著我將𪜶對埃及地導出來。我是上主。
26:46 以上諸個是上主佇西奈山，通過摩西對以色列人頒布的規例、命令，及教示。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。