上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
約翰福音
迦拿的婚禮
2:1 第三日，佇加利利的迦拿有婚姻的筵席，耶穌的老母佇遐。
2:2 耶穌及伊的學生也互𪜶請去赴筵席。
2:3 酒用了，耶穌的老母就對伊講：「𪜶無酒啦。」
2:4 耶穌給伊講：「老母啊，我及你甚麼干涉？我的時猶未到。」
2:5 伊的老母給諸個差用的人講：「凡若伊給恁講的，恁著行伊。」
2:6 照猶太人洗清氣的例，佇遐有排六個石甕，逐個會貯得二三桶水。
2:7 耶穌給差用的人講：「用水互伊滿甕。」就互伊滿到甕口。
2:8 閣給𪜶講：「今著舀伊，捧互掌理筵桌的人。」就捧互伊。
2:9 水變做酒，掌理筵桌的試飲伊，知對叨落來，獨獨舀水的差用知。掌理筵桌的就叫新子婿來，
2:10 給伊講：「人攏是代先排好酒，到人飲多多，才用卡次的，獨獨你留好酒到此霎！」
2:11 此個頭一擺的神蹟，耶穌行佇加利利的迦拿，來顯出伊的榮光；伊的學生就信伊。
2:12 此個事以後，伊及伊的老母、及兄弟，以及伊的學生落去迦百農，𫢶遐無幾日。
清氣聖殿
2:13 ( 太 21:12-13 可 11:15-17 路 19:45-46 )
猶太人的𨃟過節近啦，耶穌上耶路撒冷。
2:14 佇殿裡抵著有賣牛、羊、鴿仔，亦有換錢的啲坐，
2:15 耶穌用索做鞭，趕𪜶及羊牛攏出殿，閣捙倒換錢的人的錢，反輪轉𪜶的桌，
2:16 閣給賣鴿仔的講：「帶諸個物去！通用我的父的厝做買賣的厝。」
2:17 伊的學生記得聖經有記講：「我為著你的厝，心內親像火𤏸。」
2:18 猶太人就應伊講：「你做諸個代誌，用甚麼神蹟互阮看？」
2:19 耶穌應講：「恁毀壞此個殿，我三日欲閣起伊。」
2:20 猶太人就講：「此個殿歷過四十六年才起好，亦你三日欲閣起伊嗎？」
2:21 若是伊按呢講是啲論伊的身軀的殿。
2:22 到伊對死人中復活，伊的學生才記得伊曾按呢講，就信聖經及耶穌所講的話。
耶穌知人的心內
2:23 當𨃟過節耶穌佇耶路撒冷，佇節期中多多人看見伊所行的神蹟，就信伊的名。
2:24 若是耶穌無用本身交託𪜶；因為伊知眾人，
2:25 也無欠用人對伊證明人是怎樣，因為伊家己知人心內所囥的。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。