上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
耶利米及祭司巴施戶珥衝突
20:1 祭司音麥的子巴施戶珥做管耶和華的厝的頭人，
20:2 聽見耶利米傳諸個話，巴施戶珥就拍先知耶利米，用柴枷給伊枷佇便雅憫頂的門，此個門佇耶和華的殿內。
20:3 過日，巴施戶珥開柴枷解放耶利米。耶利米就對伊講：「耶和華是叫你的名做巴施戶珥，就是叫你瑪歌珥‧米撒畢，
20:4 因為耶和華按呢講：『看啊，我欲互你做你本身，及你眾朋友驚惶的原因；𪜶欲倒佇對敵的刀下，你欲親目看見；我欲將猶大人攏交佇巴比倫王的手，伊欲掠𪜶到巴比倫，用刀刣𪜶。
20:5 閣我欲將此個城攏總的貨財及著磨所得著的，及一切的寶貝，以及猶大許個王的寶物，攏交佇𪜶的對敵的手；對敵欲搶𪜶，欲掠𪜶帶到巴比倫。
20:6 你此個巴施戶珥啊，你及一切𫢶你家內的人攏欲互人掠去，你及你的眾朋友，就是你對𪜶傳假話的，攏欲到巴比倫，死佇遐，埋葬佇遐。』」
耶利米向耶和華投訴
20:7 耶和華啊，你曾勉強我，
我也互你勉強。
你比我卡有力，來贏我。
我通日成做笑話，
人攏戲弄我。
20:8 我逐擺講的時，就出哀傷的聲，
我叫講：強暴！搶劫！
因為耶和華的話通日成做我的凌辱、譏刺。
20:9 我若講：我無欲閣提起耶和華，
亦無欲閣託伊的名來講，
就佇我的心內有親像𤏸的火關密佇我的骨內，
我就愞𣍐住，𣍐會家己禁止。
20:10 我聽見多多人的誹謗，
四圍攏是驚惶；
我知己的朋友，就是啲當等我跋倒者，講：
著告伊，阮亦欲告伊！
豈採伊受引誘，
咱就會贏伊，
對伊報讎。
20:11 總是，耶和華及我佇啲，
親像真通驚的勇士。
所以，窘迫我的欲跋倒，
𣍐會贏；
𪜶欲大大見誚，
就是受永無𣍐記得的漏氣，
因為𪜶行代誌無智慧。
20:12 萬軍的耶和華啊，你是試驗義人、鑑察人的心腹心腸者，
求你互我看見你對𪜶報讎，
因為我將我的案件稟明佇你。
20:13 恁著向耶和華唱歌；
謳咾耶和華！
因為伊救喪鄉人的生命脫離歹人的手。
20:14 我出世的日願彼個日子受咒詛；
我的老母生我的日願彼個日子無得著福氣！
20:15 人報我的老父講「你有生查甫子」，
互伊真歡喜者，
願彼個人受咒詛。
20:16 願彼人親像耶和華所捙倒許個城，也無退悔者；
願伊早起時聽見哀慘的聲，
日中晝聽見喝喊的聲；
20:17 因為伊無對胎裡互我死，
互我的老母做我的墓，
伊的胎常常大的。
20:18 我啥事出胎來抵著著磨憂苦，
互我的年日因為見誚來消滅啊？
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。