上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
1:1 此本冊是耶利米的言行錄。耶利米是便雅憫地區，亞拿突城一個祭司希勒家的子。
1:2 亞們的子約西亞做猶大王第十三年，上主的話臨到耶利米。
1:3 約西亞的子約雅敬做猶大王期間，到約西亞的子西底家做猶大王最後一年，第十一年五月，耶路撒冷的住民受掠去巴比倫的時，上主常常對耶利米講話。
耶利米受選召
1:4 上主對我講：
1:5 「我猶未互你佇母胎成形以前，已經揀你；你猶未生出來以前，就給你分別作聖，選立你做列國的先知。」
1:6 我應講：「至高的上主，你知，我猶少年，閣頇顢講話。」
1:7 毋拘上主對我講：「你毋通講你少年。我給你派去叨位，你著去；叫你講什麼，你著講。
1:8 你毋免驚𪜶，因為我及你同在，欲保護你。我上主按呢宣布！」
1:9 上主就伸手摸我的嘴，對我講：「現在，我將我的話下佇你的嘴裡。
1:10 我今仔日授權互你，互你佇列國萬民做拔出及拆毀、破壞及推翻、重建及栽種的工作。」
兩個異象
1:11 上主對我講：「耶利米，你有看見什麼？」
我應講：「我看見一枝杏樹的樹枝。」
1:12 上主就講：「你看了著，我不時警覺，欲互我的話實現。」
1:13 上主閣對我講：「你有看見什麼？」
我講：「我看見一個啲滾的鍋仔，對北旁摒落來。」
1:14 伊對我講：「欲有災難對北旁發出，臨到此個地所有的住民。
1:15 我欲給北方列國所有的人召集來，互𪜶佇耶路撒冷逐個城門口設寶座，圍攻城牆；閣欲攻擊猶大逐個城鎮。
1:16 諸個人民棄拺我，去給別個神明燒香，跪拜家己的手造的偶像；我欲因為𪜶的罪給𪜶審判，給𪜶刑罰。
1:17 所以，耶利米，你著準備好勢，將我命令你講的話攏給𪜶講；毋通因為𪜶驚惶，才免我互你佇𪜶的面前驚惶。
1:18 你著會記得，我今仔日欲互你成做堅固的城，成做銅牆鐵壁，會當對抗全國，對抗猶大的王、官長、祭司，及人民。
1:19 𪜶會攻擊你，毋拘𣍐贏你；因為我及你同在，欲保護你。我上主按呢宣布！」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。