上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
上帝欲處罰埃及
19:1 這是有關埃及的信息。
看咧，上主坐快速的雲，
飛來埃及。
埃及的偶像會佇伊面前皮皮惙；
埃及人的心會消熔失膽。
19:2 上主講：
我欲激起埃及人攻擊埃及人：
兄弟攻擊兄弟，
厝邊攻擊厝邊，
城攻擊城，
國攻擊國。
19:3 埃及人會失膽無力；
我欲拍亂𪜶的計劃。
𪜶會去尋𪜶的偶像及唸咒的，
去求𪜶的牽亡的及童乩桌頭。
19:4 我欲給埃及人交互
一個兇惡的國王統治。
至高上主 — 萬軍的統帥按呢宣告。
19:5 海水會焦去，
江河會焦硞硞。
19:6 運河的水會臭，
尼羅河的水會減少煞焦去；
蘆葦及蘆竹攏會凋去。
19:7 尼羅河河口及沿岸栽種的，
會枯焦，互風吹散煞無去。
19:8 掠魚的人會哀哭；
佇尼羅河釣魚的會悲傷；
佇河裡拋網的攏𣍐當生活。
19:9 挲麻做紗及織麻紗的人
攏會失望見笑。
19:10 織布師傅會餒志；
倩來的工人會煩惱憂愁。
19:11 瑣安的領袖有夠愚戇；
法老上有智慧的顧問無好的計策。
恁哪會當給法老講
「我是有智慧的人的後代，
是古早君王的子孫」？
19:12 埃及王，你有智慧的顧問佇叨位？
𪜶現在著講互你知
上主 — 萬軍的統帥欲對付埃及的計劃。
19:13 瑣安的領袖有夠戇，
孟斐斯的領袖互人騙去啦；
諸個支族的棟樑給埃及導迷路。
19:14 上主給錯亂的神灌入𪜶內面，
互埃及所做一切的代誌攏差錯，
親像酒醉的人那顛那吐。
19:15 佇埃及，無一個有路用，
無論是頭抑是尾溜，
棕樹枝抑是蘆葦，攏像款！
埃及會敬拜上主
19:16 佇彼日，埃及人會親像婦仁人驚惶愕愕惙，因為上主 — 萬軍的統帥攑手欲處罰𪜶。
19:17 猶大地嘛會互埃及人驚惶；若有人提起猶大的名，𪜶就皮皮惙，因為上主 — 萬軍的統帥有計劃欲對付𪜶。
19:18 佇彼日，埃及有五個城市，人會講希伯來話，對上主 — 萬軍的統帥宣誓盡忠；其中有一個城叫做「太陽城」。
19:19 佇彼日，埃及地的中心會起造一座祭壇獻互上主，嘛會佇邊界𫞼一支獻互上主的柱。
19:20 諸個欲做上主 — 萬軍的統帥臨在佇埃及的記號及見證。埃及人受壓迫求叫上主的時，伊會替𪜶差一個拯救者來保護𪜶，解放𪜶。
19:21 上主會對埃及人顯示伊本身。佇彼日，埃及人會承認上主，對伊獻燒化祭及素祭，嘛會對伊下願閣謝願。
19:22 上主一定會責罰埃及人，然後給𪜶醫治。𪜶越轉身歸向上主的時，伊會聽𪜶的祈求，給𪜶醫好。
19:23 佇彼日，對埃及到亞述會開一條大路。亞述人會去埃及，埃及人會去亞述；埃及人及亞述人會做夥敬拜上主。
19:24 佇彼日，以色列會及埃及以及亞述，三國做夥成做全世界的祝福。
19:25 上主 — 萬軍的統帥欲賜福互𪜶，講：「願我的子民埃及，我的手所造的亞述，我的選民以色列，攏受祝福！」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。