上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
葡萄園的歌
5:1 我欲為著我所親疼者唱歌，
是我所疼者的歌，論伊的葡萄園：
我所親疼者有葡萄園佇真肥的山頭。
5:2 伊開墾彼個園，除去石頭，
栽上等的葡萄樹，
佇園內起一座樓，
閣掘酒窟佇遐；
向望結好的葡萄，
無拍算結野葡萄。
5:3 恁徛起耶路撒冷者及猶大人啊，
今請恁佇我及我的葡萄園中，判斷著著。
5:4 我為我的葡萄園所做的以外，
猶有甚麼通做啊？
我向望結好的葡萄，
怎樣反轉結野葡萄啊？
5:5 今我給恁講，
我欲對我的葡萄園怎樣行：
我欲拆去籬笆，互伊受吞滅，
拆毀圍牆，互伊受𧿬踏。
5:6 我欲互伊荒廢，無閣修整，
無閣耡剷，反轉發莿仔及蒺藜。
我也欲命令雲無落雨佇伊的頂面。
5:7 因為萬軍的耶和華的葡萄園就是以色列家；
伊所歡喜的樹就是猶大人。
伊所向望的是公平，
反轉有暴虐；
所向望的是公義，
反轉有叫冤枉。
人的惡行
5:8 有災禍啊！許個用厝接厝，
用田接田，
致到無留空地的，
剩恁家己徛彼個境內。
5:9 我親耳聽見萬軍的耶和華講：
的確有多多大閣媠的厝宅，
成做拋荒，無人徛起。
5:10 三十畝的葡萄園只有出一罷特的酒；
一賀梅珥的種子只有收成一伊法的米糧。
5:11 災禍啊！許個透早起來放縱飲厚酒，
直直到暝深，甚至到因為酒發狂。
5:12 𪜶佇筵桌
彈琴，彈瑟，拍鼓，歕笛仔，飲酒，
無想著耶和華的所行，
亦無留心伊的手所做的。
5:13 所以，我的百姓因為無知受人掠去；
𪜶尊貴的人真枵餓，
歸陣的百姓極其嘴乾。
5:14 因為，陰間擴大伊的所愛，
開伊無限量的嘴；
𪜶的榮光、𪜶的眾人、𪜶的奢華，
及𪜶中間快樂的人攏落佇彼內面。
5:15 卑賤者屈落；
尊貴者降低；
目頭高的人也降低。
5:16 只有萬軍的耶和華對審判來尊做高；
聖的上帝對公義顯明做聖。
5:17 彼時，羊仔欲來食草，親像佇家己的草場；
富人拋荒的所在，出外人欲食伊。
5:18 有災禍啊！用虛假做索來引罪惡！
閣親像用拖車的索來搝罪過，
5:19 𪜶講：願伊緊緊行，快快成伊的所做，
互阮看見；
願以色列的聖者所計劃的迫倚來，
互阮知。
5:20 有災禍啊！許個稱歹做好，稱好做歹，
用暗做光，用光做暗，
用苦做甜，用甜做苦的。
5:21 有災禍啊！許個家己看做有智慧，
家己看做通達者。
5:22 有災禍啊！許個勇敢佇飲酒，
用能力調和厚酒者。
5:23 𪜶因為受賄賂，就稱歹人做義，
將義人的義給伊搶去。
5:24 所以親像火舌燒稻稿，
乾草落佇火焰中，
親像按呢，𪜶的根欲親像朽爛的物，
𪜶的花欲親像塵埃飛起來；
因為𪜶棄拺萬軍的耶和華的教示，
看輕以色列的聖者的話。
5:25 所以，耶和華的受氣對伊的百姓發作。
伊的手伸出攻擊來拍𪜶，諸個山嶺就搖泏；
𪜶的身屍佇街市親像糞土。
雖然按呢，伊的受氣猶未消；
伊的手猶伸啲。
5:26 伊欲出旗號，招遠遠的百姓，
出口號叫𪜶對地極來；
看啊，𪜶欲緊緊走來。
5:27 其中無有厭倦者，無有跋倒者；
無有盹眠者，無有睏者；
腰帶也無放鬆，
鞋帶也無拍斷。
5:28 𪜶的箭真利，
弓也拼緊。
馬蹄親像𠕇的石，
車輪親像捲螺風。
5:29 𪜶欲哮，親像母的獅，
亦親像細隻獅啲哮；
𪜶欲噤噤哮來搙𪜶所咬的物，
拖到穩當的所在，無人會救倒轉。
5:30 彼日，𪜶欲對𪜶噤噤哮，
親像海嘩嘩哮；
人若看落地，就看見有黑暗艱苦，
光明佇雲內變做黑暗。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。