上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
詩篇
上主的律法
119:1 行為無通指責，
生活遵行上主律法的人，
此款人真有福氣！
119:2 聽趁上主的教示，
全心尋求伊的人，
此款人真有福氣！
119:3 𪜶無做不義的事，
有遵行伊的道路。
119:4 上主，你將你的律例命令阮，
愛阮確實遵守。
119:5 願我的所行所做，
確實有啲遵守你的規例。
119:6 我重視你一切的誡命，
𣍐致到失敗見笑。
119:7 我學習你公正的判斷；
我欲誠心感謝你。
119:8 我欲遵守你的規例；
求你絕對毋通放拺我。
意愛上主的律法
119:9 少年人著按怎互生活純潔？
著遵行你的話！
119:10 上主啊，我欲全心尋求你；
求你互我無偏離你的誡命。
119:11 我將你的話囥佇心內，
才免犯罪得罪你。
119:12 上主啊，你應該受稱讚；
求你教我識你的規例。
119:13 你所講一切的規例，
我用嘴出聲唸。
119:14 我意愛你的教示，
親像人意愛大財富。
119:15 我那唸那想你的律例，
重視你的道路。
119:16 我意愛你的命令，
𣍐𣍐記得你的話。
遵趁上主的律法
119:17 求你施大恩互你的僕人，
互我活通遵趁你的話。
119:18 求你開我的目睭，
互我看出你律法的奇妙。
119:19 我佇地上是出外人；
求你毋通對我蓋密你的誡命。
119:20 我不時迫切欣慕你的規例，
欣慕到強欲暈去。
119:21 你責備驕傲受咒詛的人；
𪜶迷路離開你的誡命。
119:22 人對我的凌辱及看輕，求你除去，
因為我有遵守你的教示。
119:23 統治者坐啲參詳欲害我，
毋拘你的僕人啲默想你的命令。
119:24 你的教示是我所意愛，
是我的導師。
持守上主的律法
119:25 我受拍倒仆佇土腳；
求你照你的應允保守我的性命。
119:26 我對你講起所做的代誌，你有應我；
求你教我識你的規例。
119:27 求你互我明白你的律例，
我通默想你奇妙的作為。
119:28 我的心悲傷到欲碎去；
求你照你的應允互我回復元氣。
119:29 求你互我無行虛假的道路；
求你施恩教示我你的律法。
119:30 我有揀真實的路；
我看重你的規例。
119:31 我持守你的教示；
上主啊，求你毋通互我失敗見笑。
119:32 我欲熱切追求你的誡命，
因為你有開我的心竅。
求智慧了解上主的律法
119:33 上主啊，求你將遵守你命令的道路指示我，
互我知按怎徹底遵守。
119:34 求你互我有智慧遵守你的律法，
通全心遵守。
119:35 求你導我行你誡命的路；
此個路我真意愛。
119:36 求你互我的心歸向你的教示，
無向不義的錢財。
119:37 求你互我𣍐意愛虛假，
照你的話賜我活命。
119:38 求你實現對你僕人的應允，
互人通敬畏你。
119:39 求你互我所驚的凌辱離開我，
因為你的規例是好。
119:40 我欣慕你的律例；
求你照你的公義賜我活命。
信靠上主的律法
119:41 上主啊，求你顯示你的慈愛，
照你的應允拯救我，
119:42 我就通應答凌辱我的人，
因為我倚靠你的話。
119:43 求你毋通將真理的話對我的嘴搶去，
因為我仰望你的判斷。
119:44 我欲繼續守你的律法，
直到永遠。
119:45 我欲自由自在生活，
因為我有尋求你的律例。
119:46 我佇君王的面前講論你的教示，
嘛𣍐致到見笑。
119:47 你的誡命互我喜樂，
因為諸個誡命是我所意愛。
119:48 我尊重閣意愛你的誡命；
我嘛欲那唸那想你的規例。
確信上主的律法
119:49 求你會記得對你僕人的應允，
因為你互我有向望。
119:50 佇患難中，我得著安慰；
對你的應允，我得著活命。
119:51 驕傲的人一直侮辱恥笑我，
猶久我毋曾偏離你的律法。
119:52 上主啊，我會記得你古早以來的規例，
對諸個得著安慰。
119:53 我因為許個棄拺你律法的歹人，
起大受氣，親像火啲𤏸。
119:54 我無論出外去叨位，
攏用你的規例做詩歌。
119:55 上主啊，我暝時會記得你的同在，
遵守你的律法。
119:56 我得著福分，
因為我有順趁你的律例。
熱心遵趁上主的律法
119:57 上主是我的產業；
我曾講：「我欲遵趁你的話。」
119:58 我曾全心求你的恩；
求你照你的應允憐憫我。
119:59 我深深思想你的道路，
越轉身歸向你的教示。
119:60 我趕緊無延延，
欲守你的誡命。
119:61 歹人的索捆縛我，
毋拘我無𣍐記得你的律法。
119:62 我因為你公正的判斷，
半暝起來感謝你。
119:63 所有敬畏你，遵守你律例的人，
我及𪜶做朋友。
119:64 上主啊，你的慈愛遍滿全地；
求你教我識你的規例。
上主寶貴的律法
119:65 上主啊，你有照你的應允，
好款待你的僕人。
119:66 求你教示我，互我有智識及正確的判斷，
因為我信靠你的誡命。
119:67 我前有行迷路，受你警戒，
今我遵守你的話。
119:68 你是良善，你的所做攏是好；
求你教我識你的規例。
119:69 驕傲的人用白賊話攻擊我，
毋拘我欲全心遵守你的律例。
119:70 𪜶的心親像互油包密麻痺，
毋拘我意愛你的律法。
119:71 我受管教對我有利益，
互我通學習你的規例。
119:72 你所講的律法對我有利益，
贏過千萬的金銀。
上主公義的律法
119:73 你的手創造我，捏造我；
求你賜我智慧通學習你的誡命。
119:74 敬畏你的人會看見我來歡喜，
因為我仰望你的話。
119:75 上主啊，我知你的判斷公正，
你有照你的信實管教我。
119:76 求你照你對僕人的應允，
用你的慈愛安慰我。
119:77 願你的慈悲臨到我，互我通活，
因為你的律法是我所意愛。
119:78 願驕傲的人失敗見笑，因為𪜶無理由枉屈我，
毋拘我欲那唸那想你的律例。
119:79 願敬畏你，認識你教示的人，
倒轉來接納我。
119:80 願我全心遵守你的規例，
互我𣍐致到失敗見笑。
祈求上主解救
119:81 我的心迫切欣慕你的拯救到欲暈去；
你的話互我有向望。
119:82 我因為向望你的應允到目睭欲花去；
我講：「你什麼時欲安慰我？」
119:83 雖然我親像皮袋互火燻甲欲焦去，
猶久我無𣍐記得你的命令。
119:84 你的僕人著閣忍耐偌久？
你底時才欲審判窘迫我的人？
119:85 驕傲無趁你律法的人，
掘陷坑欲害我。
119:86 𪜶無理由窘迫我，
毋拘你的誡命攏可靠；
求你幫贊我。
119:87 我險險仔互𪜶對地上消滅，
毋拘我無放拺你的律例。
119:88 因為你有豐盛的慈愛，求你保守我的性命；
我欲遵守你的嘴所出的教示。
相信上主的律法
119:89 上主啊，你永遠存在；
你的話確立佇天頂。
119:90 你的信實續到萬代；
你建立地，互伊確立。
119:91 天地照你的安排，到今猶存在；
𪜶攏是你的差用。
119:92 我若毋是意愛你的律法，
早就佇我的苦難中滅亡。
119:93 我永遠𣍐𣍐記得你的律例，
因為你用你的律例保守我的性命。
119:94 我是你的，求你救我，
因為我尋求你的律例。
119:95 歹人當等欲毀滅我，
毋拘我欲默想你的教示。
119:96 我看出所有完全的攏有限，
只有你的誡命完全，無界限。
意愛上主的律法
119:97 我實在真意愛你的律法，
歸日那唸那想。
119:98 你的誡命不時佇我身邊，
互我比我的對敵較有智慧。
119:99 我比我攏總的先生較通達，
因為我那唸那想你的教示。
119:100 我比老人較有智慧，
因為我遵守你的律例。
119:101 我禁止我的腳行一切的歹路，
互我通遵行你的話。
119:102 我無偏離你的規例，
因為你有教示我。
119:103 你的話佇我嘴內，
比蜜閣較甜。
119:104 我對你的律例得著智慧，
所以我怨恨一切邪惡的路。
上主律法的光
119:105 你的話是我腳前的燈，
是我路上的光。
119:106 你公正的判斷，我決意欲遵行；
我一定欲按呢遵守。
119:107 我受著極大的苦難；
上主啊，求你照你的應允保守我的性命。
119:108 上主啊，求你接受我的嘴歡喜獻的謳咾，
閣將你的規例教示我。
119:109 我的性命不時抵著危險，
猶久我無𣍐記得你的律法。
119:110 歹人設羅網欲害我，
猶久我無偏離你的律例。
119:111 我將你的教示做永遠的產業，
因為諸個是我心所意愛。
119:112 我全心歸向你的命令，
永遠遵趁，直到性命結束。
對上主的律法得著保護
119:113 對你無忠心的人，我厭惡；
我所意愛的，是你的律法。
119:114 你是我閃匿的所在，是保護我的盾牌；
我仰望你的應允。
119:115 作歹的人啊，著離開我，
互我通遵守我的上帝的誡命。
119:116 求你照你的應允扶持我，保守我的性命，
互我無因為仰望你失敗見笑。
119:117 求你扶持我，我就得救；
我欲不時全心遵行你的命令。
119:118 違背你命令的人，你拒絕𪜶；
𪜶的詭詐會失敗。
119:119 世間的歹人，你看做糞埽給𪜶除去，
所以我意愛你的教示。
119:120 我因為驚畏你，歸身軀皮皮惙；
你的審判互我驚惶。
遵行上主的律法
119:121 我有實行公義正直；
求你毋通給我放互壓制我的人。
119:122 求你保證你的僕人事事亨通，
無受著驕傲的人壓制。
119:123 我向望你的拯救及公義的應允，
致到目睭花。
119:124 求你照你的慈愛對待你的僕人，
將你的規例教示我。
119:125 我是你的僕人，求你賜我智慧，
互我識你的教示。
119:126 上主啊，現在是你行動的時，
因為人破壞你的律法。
119:127 所以我意愛你的誡命，
比金，比純金閣較愛。
119:128 你為萬事定的律例，我攏遵行，
所以我厭惡一切虛假的路。
渴慕遵行上主的律法
119:129 你的教示奇妙，
我盡心遵守。
119:130 你的話一下解說就發出光，
連戇直的人嘛會了解。
119:131 我嘴大開直直喘，
渴慕你的誡命。
119:132 求你越過來看我，憐憫我，
親像你啲對待敬愛你名的人。
119:133 求你照你的應允引導我的腳步，
無容允罪惡管轄我。
119:134 求你救我脫離人的壓制，
互我通遵守你的律例。
119:135 願你用你的面的光照你的僕人，
教我識你的規例。
119:136 我的目屎親像溪水直直流，
因為人無遵守你的律法。
上主的律法公正
119:137 上主，你是公義；
你的判斷公正。
119:138 你頒布的律例公正，
完全可靠。
119:139 我非常受氣親像火欲給我吞滅，
因為我的對敵𣍐記得你的話。
119:140 你的應允純真可靠；
你的僕人真意愛。
119:141 我卑微，互人看輕，
毋拘我無𣍐記得你的律例。
119:142 你的公義續到永遠；
你的律法真實。
119:143 我受著患難憂苦，
猶久意愛你的誡命。
119:144 你的教示永遠公正；
求你賜我智慧，互我通活。
祈求上主解救
119:145 上主啊，我全心求叫你，求你應我；
我欲遵守你的命令。
119:146 我求叫你，求你救我；
我欲遵守你的教示。
119:147 天未光我就起來求叫你；
我仰望你的話。
119:148 我歸暝目睭金金，
那唸那想你的話。
119:149 上主啊，因為你有慈愛，求你聽我的聲；
照你公正的判斷，求你保守我的性命。
119:150 計謀做歹的人逼近我；
𪜶離你的律法遠遠。
119:151 毋拘上主啊，你倚近我；
你的誡命真實可靠。
119:152 我早就學習你的教示；
你互𪜶確立到永遠。
祈求上主幫贊
119:153 求你關心我的苦難來解救我，
因為我無𣍐記得你的律法。
119:154 求你給我申冤，救贖我，
照你的應允保守我的性命。
119:155 救恩離開歹人遠遠，
因為𪜶無尋求你的命令。
119:156 上主，你有豐盛的慈愛；
照你公正的判斷，求你保守我的性命。
119:157 窘迫我，對敵我的人真多，
猶久我無偏離你的教示。
119:158 我看著奸惡的人就真厭惡，
因為𪜶無遵守你的話。
119:159 你看我偌仔呢意愛你的律例；
上主啊，求你照你的慈愛保守我的性命。
119:160 你的話的本質是真實；
你一切公正的判斷永遠存續。
意愛上主的律法
119:161 統治者無理無由迫害我；
毋拘我的心驚畏你的話。
119:162 我意愛你的話，
親像人得著真多戰利品。
119:163 我痛恨厭惡白賊話，
毋拘我意愛你的律法。
119:164 因為你公正的判斷，
我逐日七遍稱讚你。
119:165 意愛你的律法的人有大平安，
無一項會互𪜶跋倒失敗。
119:166 上主啊，我向望你的拯救，
遵行你的誡命。
119:167 我的心有遵守你的教示；
諸個話，我非常意愛。
119:168 我有守你的律例及教示；
我的所行所做，你攏看會著。
渴慕上主拯救
119:169 上主啊，願我求叫的聲透到你的面前；
求你照你的應允賜我智慧。
119:170 願我懇求的話達到你面前；
求你照你的應允牽救我。
119:171 願我的嘴唇發出謳咾，
因為你有將你的律例教示我。
119:172 願我的舌宣布你的應允，
因為你的誡命攏公正。
119:173 求你伸手幫贊我，
因為我有選擇你的律例。
119:174 上主啊，我渴慕你的拯救；
你的律法是我所意愛。
119:175 求你互我活啲，通稱讚你，
互你的判斷幫贊我。
119:176 我迷路親像失迷的羊；
求你給你的僕人尋倒轉，
因為我無𣍐記得你的誡命。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。