上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
猶大王烏西亞
15:1 ( 代下 26:1-23 )
以色列王耶羅波安二世第二十七年，亞瑪謝的子烏西亞開始做猶大王。
15:2 伊坐位的時十六歲，佇耶路撒冷作王五十二年；伊的老母叫做耶可利雅，是耶路撒冷人。
15:3 烏西亞做上主看做好的事，照伊的老父亞瑪謝的所做去做。
15:4 毋拘山頭壇猶未廢除，人民猶原佇遐獻祭燒香。
15:5 上主降災禍，互王一生致著嚴重的皮膚病；伊就住佇受隔離的厝。伊的子約坦管理王家的事，治理國政。
15:6 烏西亞其他的事蹟及伊的所做攏記佇《猶大列王史》。
15:7 烏西亞轉去伊的列祖遐，人給伊安葬佇大闢城，伊的祖先的墓。伊的子約坦續接伊作王。
以色列王撒迦利亞
15:8 猶大王烏西亞第三十八年，耶羅波安二世的子撒迦利亞佇撒馬利亞作王，統治以色列六月日久。
15:9 伊做上主看做歹的事，照伊的祖先的所做，無離開尼八的子耶羅波安的路，互以色列人陷落罪。
15:10 雅比的子沙龍背叛撒迦利亞，佇人民的面前給伊刣死，篡伊的位。
15:11 撒迦利亞其他的事蹟攏記載佇《以色列列王史》。
15:12 上主曾對耶戶講：「你的子孫會坐以色列的王位到第四代。」此個話就按呢實現。
以色列王沙龍
15:13 猶大王烏西亞第三十九年，雅比的子沙龍佇撒馬利亞做以色列王一月日久。
15:14 迦底的子米拿現對得撒上去撒馬利亞，刣死雅比的子沙龍，篡伊的位。
15:15 沙龍其他的事蹟，及伊背叛的陰謀，攏記載佇《以色列列王史》。
15:16 彼時，米拿現對得撒去攻打提斐薩，及城內的住民以及四圍的地區；因為城內的人毋肯投降，米拿現就給𪜶剿滅，甚至破開所有有身的婦仁人的腹肚。
以色列王米拿現
15:17 猶大王烏西亞第三十九年，迦底的子米拿現作王，佇撒馬利亞統治以色列十年。
15:18 伊做上主看做歹的事，一世人無離開尼八的子耶羅波安的路，互以色列人陷落罪。
15:19 亞述王提革拉‧比列色來侵犯以色列。米拿現送銀三萬四千公斤互亞述王，求伊幫贊堅固王權。
15:20 米拿現強迫以色列的好額人負擔諸個銀，逐個人出五百七十公克，送互亞述王。亞述王就倒去伊本國。
15:21 米拿現其他的事蹟及伊的所做，攏記載佇《以色列列王史》。
15:22 米拿現轉去伊的列祖遐，伊的子比加轄續接伊作王。
以色列王比加轄
15:23 猶大王烏西亞第五十年，米拿現的子比加轄佇撒馬利亞作王，統治以色列兩年。
15:24 伊做上主看做歹的事，無離開尼八的子耶羅波安的路，互以色列人陷落罪。
15:25 伊的侍衛官，利瑪利的子比加背叛，佇撒馬利亞王宮的堡壘給伊刣死，篡伊的位；共謀的人有亞珥歌伯、亞利耶，以及五十個基列人。
15:26 比加轄其他的事蹟及伊的所做，攏記載佇《以色列列王史》。
以色列王比加
15:27 猶大王烏西亞第五十二年，利瑪利的子比加佇撒馬利亞作王，統治以色列二十年。
15:28 伊做上主看做歹的事，無離開尼八的子耶羅波安的路，互以色列人陷落罪。
15:29 比加做以色列王的時，亞述王提革拉‧比列色攻取以雲、亞伯‧伯‧瑪迦、亞挪、基低斯，及夏瑣諸個城，基列、加利利，以及拿弗他利全地區；閣將許個住民攏掠去亞述。
15:30 烏西亞的子約坦第二十年，以拉的子何細亞背叛利瑪利的子比加，給伊刣死，篡伊的位。
15:31 比加其他的事蹟及伊的所做，攏記載佇《以色列列王史》。
猶大王約坦
15:32 ( 代下 27:1-9 )
利瑪利的子以色列王比加第二年，烏西亞的子約坦開始做猶大王。
15:33 伊坐位的時二十五歲，佇耶路撒冷作王十六年；伊的老母叫做耶露莎，是撒督的查某子。
15:34 約坦做上主看做好的事，照伊的老父烏西亞的所做去做。
15:35 毋拘山頭壇猶未廢除，人民猶原佇遐獻祭燒香。約坦起上主聖殿的上門。
15:36 約坦其他的事蹟及伊的所做，攏記載佇《猶大列王史》。
15:37 彼時，上主開始差敘利亞王利汛及利瑪利的子以色列王比加去攻擊猶大。
15:38 約坦轉去伊的列祖遐，安葬佇伊的祖大闢的城，伊的祖先的墓。伊的子亞哈斯續接伊作王。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。