上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
猶大王約阿施
12:1 ( 代下 24:1-16, 23-27 )
耶戶第七年，約阿施作王，佇耶路撒冷作王四十年；伊的老母叫做西比亞，是別是巴人。
12:2 約阿施因為祭司耶何耶大的教導，一生做上主看做好的事。
12:3 毋拘山頭壇猶未廢除，人民猶原佇遐獻祭燒香。
12:4 約阿施對眾祭司講：「所有獻佇上主的聖殿分別作聖的錢，無論是逐個人應該獻的，抑是自願獻的錢，
12:5 抑是逐個祭司對伊所識的人收集的奉獻，著用來修理聖殿所有損壞的所在。」
12:6 毋拘到約阿施王第二十三年，祭司猶未修理聖殿損壞的所在。
12:7 所以約阿施王召集祭司耶何耶大及其他的祭司，對𪜶講：「恁是按怎到今猶未修理聖殿損壞的所在？恁毋通閣對人收錢，著將錢交出來，通修理聖殿損壞的所在。」
12:8 眾祭司答應無欲閣對人民收錢，嘛無欲負責修理聖殿損壞的所在。
12:9 祭司耶何耶大提一個櫃，佇頂面挖一孔，下佇祭壇邊，上主聖殿入口的正旁；守門的祭司給來敬拜的人所獻的錢攏落入去櫃內。
12:10 祭司看著櫃內的錢有夠多的時，就請王的書記及大祭司來，將上主聖殿得著的錢點算了包起來。
12:11 𪜶就將點算過的錢交互監督整修上主聖殿的人。監督的人將錢發互修理上主聖殿的作木師傅及建築工人，
12:12 土水師傅及拍石師傅；閣買柴料及拍好的石，修理上主聖殿損壞的所在，以及支付修理聖殿逐款的開銷。
12:13 毋拘奉獻佇上主聖殿的錢無用來做上主聖殿的銀杯、燈心的剪刀、盤、喇叭，及逐款金器銀器。
12:14 𪜶將錢攏交互作工的人修理上主的聖殿。
12:15 𪜶毋免及發工錢的人對賬，因為許個人做代誌誠實。
12:16 毋拘賠罪祭及贖罪祭的錢，無帶入上主的聖殿，攏歸互祭司。
12:17 彼時，敘利亞王哈薛上去攻打迦特，給伊攻取。哈薛就決定欲進攻耶路撒冷。
12:18 猶大王約阿施將伊的祖先猶大王約沙法、約蘭、亞哈謝，及伊本身所獻聖化歸上主的物，以及上主聖殿及王宮的府庫所有的金，攏送互敘利亞王哈薛。哈薛就無進攻耶路撒冷。
12:19 約阿施其他的事蹟，伊的所做，攏記載佇《猶大列王史》。
12:20 約阿施的人臣起來背叛，佇落去悉拉路中的伯‧米羅給伊刣死。
12:21 許個刣死約阿施的人臣是示米押的子約撒甲，及朔默的子約薩拔。約阿施及伊的列祖做夥安葬佇大闢城。伊的子亞瑪謝續接伊作王。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。