上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
雅各及以掃相見
33:1 雅各攑頭看，看著以掃來，閣有四百個人及伊做夥，就將許個囝仔分開，交互麗亞及蕾潔，以及兩個女婢。
33:2 雅各將女婢及𪜶的子排做頭前，麗亞及伊的子排佇後面，蕾潔及約瑟排佇路尾。
33:3 伊本身行去𪜶的頭前，連連七遍仆佇土腳拜，倚近伊的兄哥。
33:4 以掃走來迎接伊，給伊攬啲，閣攬伊的頷頸給伊唚；兩個攏大聲哮。
33:5 以掃攑頭看著許個婦仁人及囝仔，就問：「諸個及你做夥的是什麼人？」
雅各講：「諸個囝仔是上帝賞賜互你的僕人的。」
33:6 講了，兩個女婢及𪜶的囝仔進前來拜。
33:7 麗亞及伊的囝仔嘛進前來拜；路尾，約瑟及蕾潔嘛進前來拜。
33:8 以掃講：「我抵著彼陣牲生，是欲做什麼？」
雅各講：「是向望對我的主得著恩典。」
33:9 以掃講：「小弟，我的已經有夠多啊，你的你留啲。」
33:10 雅各講：「毋通按呢。我若對你得著恩典，請你著接受我的禮物。你歡喜接納我，我看著你的面，親像見著上帝的面。
33:11 請接受我帶來送你的禮物；因為上帝恩待我，互我逐項充足。」雅各再三拜託，以掃就接受。
33:12 以掃講：「咱來去，我做頭前導路。」
33:13 雅各對伊講：「我的主，你知諸個囝仔軟汫，牛羊嘛抵仔生；若歸日攏啲趕路，歸群羊攏會死。
33:14 請我的主先行，你的僕人隨後面；牲生及囝仔會當行偌緊，阮就行偌緊。阮會到以東我的主遐。」
33:15 以掃講：「若是按呢，我留一寡我的人及你做陣。」
雅各講：「千萬毋通。我的主對我已經有夠好啦。」
33:16 彼日以掃出發，照原路倒去以東。
33:17 雅各行到疏割，佇遐為家己起厝，為牲生搭草寮仔；伊給彼個所在號名叫做疏割。
33:18 雅各對美索不達米亞平安倒來到迦南地的示劍城，佇城的對面搭布棚。
33:19 伊搭布棚彼塊地，是伊用一百塊銀對示劍的開拓者哈抹的後代買的。
33:20 雅各佇遐起一座祭壇，給伊號名叫做伊勒‧伊羅伊‧以色列。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。