上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
以利沙幫贊散赤的寡婦
4:1 有一個先知的學生的某，對以利沙哀求講：「你的僕人，我的丈夫已經死；你知伊是敬畏上主的人。今債主來欲掠我兩個子去做奴隸。」
4:2 以利沙問伊講：「你愛我給你做什麼？你給我講，你厝內有什麼？」
伊講：「你的女婢厝內賰一瓶油，以外逐項攏無。」
4:3 以利沙講：「你去給厝邊借空的器具，愈多愈好；
4:4 然後入去厝內，關門，及你許個子𫢶內面，斟油佇所有的器具；斟滿的下一旁。」
4:5 婦仁人轉去，關門，及伊許個子𫢶內面；子帶器具來互伊，伊就斟油。
4:6 許個器具攏斟滿，伊給伊的子講：「閣提器具來互我。」
子講：「已經無器具啦。」油就無閣流出來。
4:7 婦仁人去給上帝重用的人報告，伊就對婦仁人講：「你去賣油來還債；所賰的，你及你的子通度活。」
書念的婦仁人接待以利沙
4:8 有一日以利沙來到書念，佇遐有一個好額的婦仁人，強強留伊食飯；後來以利沙逐遍對遐經過，就入去遐食飯。
4:9 婦仁人給伊的丈夫講：「常常對咱遮經過彼個人，我看伊是聖者，是上帝重用的人。
4:10 咱來佇厝頂起一間細間房間，內面下眠床、桌仔、椅仔、燈台，互伊來咱遮的時，通入去歇睏。」
4:11 有一日以利沙來到遐，就入去彼間房間歇睏。
4:12 以利沙給伊的僕人基哈西講：「你請此個書念的婦仁人來。」伊去請伊來，婦仁人就來。
4:13 以利沙給伊的僕人講：「你給伊講：『你為著阮費真多心思，今我著為著你做什麼？你愛我替你給王抑是元帥請求什麼？』」
婦仁人應講：「我及我的同胞做夥徛起，無欠什麼。」
4:14 以利沙問基哈西，講：「按呢，我會當為著伊做什麼？」
基哈西講：「伊無子，伊的丈夫嘛老啊。」
4:15 以利沙閣講：「請伊來。」基哈西就請伊來。婦仁人來徛佇門口。
4:16 以利沙講：「明年此個時，你會抱一個查甫子。」
婦仁人講：「我的主，上帝重用的人，給我騙。」
4:17 婦仁人果然懷孕，到隔年此個時生一個查甫嬰，抵照以利沙所講的話。
4:18 囝仔大漢；有一日出去到伊的老父及收割的人遐。
4:19 伊對老父講：「我的頭殼，我的頭殼！」
伊的老父給僕人講：「緊給抱去𪜶老母遐。」
4:20 僕人就給抱去伊的老母遐；囝仔坐佇老母的腳頭窩，到中晝就死。
4:21 老母抱伊的子𬦰起去樓頂，將伊的子下佇上帝重用的人的眠床，關門出來。
4:22 伊叫伊的丈夫來，給伊講：「請差一個僕人牽一隻驢來我遮；我欲趕緊去尋上帝重用的人，才倒來。」
4:23 丈夫講：「今仔日毋是初一，嘛毋是安歇日，是按怎你欲去伊遐？」
婦仁人講：「無什麼代誌！」
4:24 驢準備好勢，伊就給僕人講：「行，趕緊來去！我若無給你講，毋通慢落來。」
4:25 婦仁人就去迦密山，上帝重用的人遐。
上帝重用的人遠遠看著婦仁人，給伊的僕人基哈西講：「你看，書念的婦仁人來啊。
4:26 你走去迎接伊，問伊講：『你平安無？你的丈夫平安無？囝仔平安無？』」
婦仁人應講：「攏平安。」
4:27 婦仁人上山，去到上帝重用的人遐，給以利沙的腳𢯾啲。基哈西進前欲給伊捙開；上帝重用的人講：「出在伊，因為伊心內痛苦；上主對我隱瞞此個代誌，無給我講。」
4:28 婦仁人對以利沙講：「我豈曾對我的主求子？我豈無講給我騙？」
4:29 以利沙給基哈西講：「你著準備通出發，攑我的柺仔，趕緊去。若抵著人，毋通給𪜶請安；人若給你請安，嘛毋通應。著將我的柺仔下佇囝仔的面。」
4:30 囝仔的老母講：「我指永活的上主及你的性命咒誓，我一定無欲離開你。」以利沙就起來，隨伊去。
4:31 基哈西代先到位，將柺仔下佇囝仔的面；毋拘囝仔無出聲，無反應。基哈西倒轉去，抵著以利沙，給伊講：「囝仔無醒。」
4:32 以利沙到位，入去厝內，看著囝仔已經死，下佇伊的眠床。
4:33 伊入去，就關門，只有𪜶兩個佇內面；伊就祈禱上主。
4:34 伊𬦰起去眠床仆佇囝仔的身軀，嘴對嘴，目睭對目睭，手對手。伊歸身軀俯佇囝仔的頂面的時，囝仔漸漸回復體溫。
4:35 伊落來，佇厝內行一輪，閣𬦰起去，歸身軀俯佇囝仔的頂面。囝仔拍咳啾七遍，目睭就搋開。
4:36 以利沙叫基哈西，講：「你叫此個書念的婦仁人來。」基哈西就去叫伊。伊就入來，以利沙對伊講：「給你的囝仔抱起來。」
4:37 婦仁人仆佇以利沙的腳前，拜伊，然後抱伊家己的子出去。
兩個神跡
4:38 有一遍，國內發生飢荒，以利沙轉來吉甲。先知的學生坐佇伊的面前，伊吩咐僕人講：「你起火，用大的鍋仔煮菜湯互學生食。」
4:39 有一個人去園裡挽菜，看著一欉野瓜藤，就挽真多野瓜倒來；切切咧落佇煮菜湯的鍋仔；𪜶毋識彼個是什麼。
4:40 煮好，倒出來互大家食。𪜶食的時，攏喝講：「上帝重用的人，鍋仔內的物件食了會死。」𪜶就毋敢食。
4:41 以利沙講：「提一寡麵粉來。」伊將麵粉撒佇鍋裡，講：「倒出來互大家食。」鍋仔內的物件就無閣有毒。
4:42 有一個人對巴力‧沙利沙來，帶初熟的大麥做的餅二十個，及新的麥穗，貯佇袋仔，送互上帝重用的人。以利沙講：「將諸個互大家食。」
4:43 伊的僕人講：「諸個豈有夠互一百個人食？」
以利沙講：「做你分互大家食，因為上主按呢講：『𪜶欲食到飽，閣有賰。』」
4:44 伊的僕人就分互大家。照上主所講的話，𪜶攏食甲飽，閣有賰。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。