上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
雅各準備及以掃見面
32:1 雅各繼續伊的行程，上帝的使者抵著伊。
32:2 雅各看著𪜶，就講：「遮是上帝的營地。」伊就給彼個所在叫做瑪哈念。
32:3 雅各派人先去以東地區，就是西珥，見伊的兄哥以掃。
32:4 雅各交代𪜶講：「恁著給我的主以掃講：『你的僕人雅各按呢講：我佇拉班遐寄居，住到今仔日。
32:5 我有牛、驢、羊群、僕人、女婢。今我派人來對我的主報告，向望對你得著恩典。』」
32:6 派去的人倒來給雅各報告：「阮有去你的兄哥以掃遐，伊已經來欲看你，閣導四百個人做夥來。」
32:7 雅各大驚閣煩惱。伊將及伊做夥的人，以及羊群、牛群、駱駝分做兩隊，
32:8 想講：「以掃若來攻擊此隊，賰的彼隊猶通逃走。」
32:9 伊祈禱講：「我的阿公亞伯拉罕的上帝，我的老父以撒的上帝，上主啊，你曾給我講：『你著倒去你的本地本族，我一定欲好款待你。』
32:10 你的僕人真卑微，𣍐堪得領受你的慈愛及信實。我以前干焦攑柺仔過約旦河，今我已經帶兩隊人馬倒來。
32:11 求你救我免受我的兄哥以掃的傷害；我真驚伊來刣死我及我的某子。
32:12 你嘛曾講：『我一定欲好款待你，互你的後代親像海邊的沙多甲算𣍐了。』」
32:13 彼暗雅各佇遐歇暝，就對伊的牲生揀禮物，欲送伊的兄哥以掃：
32:14 山羊母兩百隻、山羊二十隻、綿羊母兩百隻、綿羊二十隻、
32:15 駱駝母及𪜶食奶的駱駝子三十隻、牛母四十隻、牛十隻、驢母二十隻、驢十隻。
32:16 伊將諸個牲生分做一隊一隊，交代伊的僕人；伊給僕人講：「恁作前去，互逐隊保持距離。」
32:17 伊閣吩咐導頭的僕人，講：「我的兄哥以掃抵著恁的時，伊若問講：『你是什麼人的僕人，欲去叨位？你頭前許個牲生是什麼人的？』
32:18 你著講：『諸個是你的僕人雅各的，是欲送我的主以掃的禮物。伊本身嘛佇阮後面。』」
32:19 雅各閣吩咐第二第三，及所有趕逐隊牲生的僕人，講：「恁抵著以掃的時，嘛著照按呢給伊講。
32:20 閣恁嘛著講：『你的僕人雅各佇阮後面。』」雅各家己拍算講：「我用頭前許個禮物來改伊的怨恨，後來我才見伊，可能伊會接納我。」
32:21 後來，伊互許個僕人帶禮物先行；彼暝雅各歇佇營中。
雅各及上帝的使者相偃
32:22 雅各暝時起來，導伊兩個某、兩個女婢，及十一個子，攏過雅博河的渡頭。
32:23 伊代先互𪜶過河，嘛互伊其他所有的過去；
32:24 只有賰雅各家己留佇遐。
彼時有一個人來及伊相偃，偃到天昲光。
32:25 彼個人看偃𣍐贏雅各，就搧伊的大腿臼；相偃的時，雅各的大腿臼脫輪。
32:26 彼個人講：「天欲光啦，著放我去。」
雅各講：「你若無給我祝福，我毋放你去。」
32:27 彼個人講：「你號做什麼名？」
伊講：「我叫做雅各。」
32:28 彼個人講：「你無欲閣叫做雅各，欲叫做以色列，因為你及上帝及人拼輸贏攏較贏。」
32:29 雅各給伊講：「請給我講你的名。」
彼個人應講：「你無應該問我的名。」伊就佇遐給雅各祝福。
32:30 雅各就給彼個所在叫做比努伊勒，講：「我當頭對面見著上帝，我猶無死。」
32:31 雅各離開比努伊勒的時，日頭照著伊。雅各跛腳，因為大腿已經脫臼。
32:32 所以以色列人到今仔日無食大腿臼的筋，因為彼個人給雅各搧大腿臼的筋。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。