上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
雅各離開拉班
31:1 雅各有聽著拉班的子啲講：「雅各將咱老父所有的攏搶去，利用咱老父的財物得著一切的財富。」
31:2 雅各看著拉班的態度無親像以前赫呢好。
31:3 上主對雅各講：「你著倒去你祖先的地，去你的親族遐；我欲及你同在。」
31:4 雅各差人去叫蕾潔及麗亞來野地的羊群遐，
31:5 對𪜶講：「我看著恁老父的態度無親像以前赫呢好；毋拘我的老父的上帝及我同在。
31:6 恁知，我有盡我所有的氣力替恁老父做工，
31:7 是恁老父騙我，曾十遍改變我的工錢，毋拘上帝毋容允伊害我。
31:8 伊若講有點的互我做工錢，羊群生的就攏有點；伊若講有條紋的互我做工錢，羊群生的就攏有條紋。
31:9 按呢，上帝將恁老父的牲生提過來賜互我。
31:10 「羊交合的時，我佇夢中攑頭一下看，看著拍羊母的羊攏是有點、有條紋、有花斑的；
31:11 上帝的使者佇夢中對我講：『雅各。』我講：『我佇遮。』
31:12 伊講：『你攑頭看，拍羊母的羊攏是有點、有條紋、有花斑的。拉班對你所做的，我攏有看著。
31:13 我是伯特利的上帝，你曾佇遐用油倒佇石柱頂，對我下願。今，你著起來，離開此個所在，倒去你的故鄉。』」
31:14 蕾潔及麗亞應伊講：「佇阮老父的家，豈猶有阮通得的家伙及產業？
31:15 阮豈毋是已經互伊看做外人？伊賣阮，吞食阮的價錢。
31:16 上帝對阮老父提去許個財物，就是阮及阮的子的。今，你著照上帝吩咐你的去做。」
31:17 雅各就隨時互伊的子及某攏騎駱駝，
31:18 閣帶伊佇美索不達米亞得著的牲生及積聚的財物出發，欲轉去迦南地伊的老父以撒遐。
31:19 彼時拉班去剪羊毛；蕾潔偷提𪜶老父厝內的家族神像。
31:20 雅各無給亞蘭人拉班講就偷偷仔離開。
31:21 伊帶伊一切所有的逃走，真緊過幼發拉底河，向基列山去。
拉班追趇雅各
31:22 到第三日，有人給拉班講雅各逃走啦。
31:23 拉班就導伊的親族做夥去追趇；趇七日，到基列山才趇著。
31:24 暝時，上帝佇亞蘭人拉班的眠夢中對伊顯現，給伊講：「你著細膩，毋通給雅各磕著。」
31:25 拉班趇著雅各，雅各已經佇基列山搭布棚；拉班及伊的親族嘛佇彼座山搭布棚。
31:26 拉班給雅各講：「你哪會做此款代誌？你瞞騙我，將我的查某子搶走，親像用刀啲押俘虜。
31:27 你是按怎無給我講就恬恬仔偷走，無通互我唱歌、拍鼓、彈琴給你歡送，
31:28 害我煞無機會通唚我的孫、我的查某子，及𪜶相辭？你實在有夠戇。
31:29 我本來會當傷害恁，毋拘恁老父的上帝昨暗對我講：『你著細膩，毋通給雅各磕著。』
31:30 你數念恁老父的家，姑不將著轉去，毋拘是按怎偷提我的神明？」
31:31 雅各應拉班講：「因為我驚你會將你的查某子搶去。
31:32 你的神明，你對啥人抄著，彼個人就該死。佇咱親族的面前，你認看我遮有什麼物件是你的，攏提去。」雅各毋知蕾潔有偷提許個神像。
31:33 拉班就入去雅各、麗亞，及兩個女婢的布棚，抄攏無，就對麗亞的布棚出來，入去蕾潔的布棚。
31:34 蕾潔提許個神像，囥佇駱駝的鞍下，人坐佇彼頂面。拉班佇伊的布棚內四界抄，嘛抄攏無。
31:35 蕾潔對伊的老父講：「我經期抵仔到，無方便佇你的面前起來；請父親大人毋通受氣。」拉班四界尋神像，尋攏無。
31:36 雅各就受氣，及拉班計較，講：「我豈有做什麼毋著，犯什麼罪，你竟然迫我即緊？
31:37 你抄我所有的物件，豈有抄著什麼是你的？若有，著下佇咱的親族面前，互𪜶給咱兩個裁決。
31:38 我及你住此二十年的中間，你的綿羊母、山羊母毋曾落胎；我嘛毋曾食你許個羊的肉。
31:39 互野獸傷害的，我毋曾帶來互你，攏是我家己承擔。羊無論日時暝時互人偷掠去，你攏要求我賠償。
31:40 我日時互日曝，暝時互霜凍，常常無睏，不時攏按呢。
31:41 我此二十年佇恁兜，為著欲娶你兩個查某子，給你做工十四年；為著欲得著你的羊群做工六年；你十遍改變我的工錢。
31:42 若毋是我的祖先亞伯拉罕的上帝，以撒所驚畏的上帝，及我同在，你一定會互我空手離開。上帝看見我的苦情及我的勞碌，才佇昨暝給你責備。」
雅各及拉班立約
31:43 拉班應雅各講：「諸個查某子是我的，諸個囝仔是我的，諸個羊群嘛是我的；你看著的，攏是我的。我的查某子及𪜶生的囝仔，我今仔日猶會當給𪜶按怎？
31:44 今，咱兩個來立約，做你及我中間的證據。」
31:45 雅各取一塊石，徛做柱。
31:46 雅各對許個親族講：「恁著去拾石頭來遮。」𪜶就將石頭拾來疊歸堆。𪜶佇彼堆石頭的邊仔飲食。
31:47 拉班就將彼堆石頭叫做伊迦爾‧撒哈杜他；雅各給伊叫做迦累得。
31:48 拉班講：「今仔日此個石堆做你我中間立約的證據。」此個所在叫做迦累得，
31:49 嘛叫做米斯巴，因為拉班講：「咱分開了後，願上主佇你我的中間監察。
31:50 你若虐待我的查某子，閣另外娶別人作某，雖然我毋知，你著會記得，上帝佇你我的中間作證。」
31:51 拉班閣對雅各講：「你看，我下佇你我中間的此堆石頭及此支石柱，
31:52 這是欲作證提醒咱，我無欲過此堆石頭去害你，你嘛𣍐用得過此堆石頭及此支石柱來害我。
31:53 願亞伯拉罕的上帝，拿鶴的上帝，𪜶祖先的上帝，佇你我的中間裁決。」雅各就指𪜶老父以撒所驚畏的上帝咒誓。
31:54 雅各佇山裡獻祭，請伊許個親族做夥飲食；𪜶食了，就佇山裡歇暝。
31:55 拉班透早起來，唚伊的孫、伊的查某子，及𪜶相辭，給𪜶祝福，然後倒去家己的所在。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。