上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
16:1 上主的話臨到哈拿尼的子耶戶，叫伊責備巴沙，講：
16:2 「我有對土粉的中間提拔你，設立你做我子民以色列的統治者，你竟然行耶羅波安的路，互我的子民以色列陷落罪，激我受氣。
16:3 看咧，我欲除滅你及你的家，嘛欲互你的家及尼八的子耶羅波安的家仝款。
16:4 所有屬巴沙的人，死佇城內的，狗會給食；死佇野外的，空中的鳥會飛來食。」
16:5 巴沙其他的事蹟，伊所做的事及伊的成就，攏記載佇《以色列列王史》。
16:6 巴沙轉去伊的列祖遐了後，安葬佇得撒；伊的子以拉續接伊作王。
16:7 上主通過哈拿尼的子先知耶戶責備巴沙及伊的家，因為伊及耶羅波安的家仝款，做上主看做歹的事，閣因為伊刣死耶羅波安全家，激動上主受氣。
以色列王以拉
16:8 猶大王亞撒第二十六年，巴沙的子以拉佇得撒作王統治以色列兩年。
16:9 伊的人臣心利，就是指揮戰車隊一半的軍官，背叛伊。以拉佇得撒，佇王宮的管家亞雜𪜶兜食酒醉的時，
16:10 心利入去給伊刣死，篡伊的位；這是猶大王亞撒第二十七年的事。
16:11 心利一下坐位統治，就刣死巴沙全家，包括親人朋友，攏無留一個查甫人。
16:12 按呢，心利除滅巴沙全家，抵抵照上主通過先知耶戶攻擊巴沙的話。
16:13 這是因為巴沙所有的罪，及伊的子以拉的罪；𪜶兩個人互以色列人陷落罪，去拜虛假的神明，激動上主 — 以色列的上帝受氣。
16:14 以拉其他的事蹟，及伊所做的事，攏記載佇《以色列列王史》。
以色列王心利
16:15 猶大王亞撒第二十七年，心利佇得撒作王七日；彼時軍兵抵仔紮營圍攻非利士的基比頓城。
16:16 營中的軍兵聽著心利背叛，閣刣死王，彼日，以色列人民就佇營中設立元帥暗利做以色列王。
16:17 暗利及以色列軍兵對基比頓上去，圍困得撒。
16:18 心利看著城已經破，就入王宮內面的堡壘，放火燒王宮，家己死佇內面。
16:19 這是因為伊有犯罪，做上主看做歹的事，行耶羅波安的路，閣互以色列人陷落罪。
16:20 心利其他的事蹟，及伊的背叛，攏記載佇《以色列列王史》。
以色列王暗利
16:21 彼時，以色列人民分做兩旁：一半隨基納的子提比尼，欲設立伊作王；一半隨暗利。
16:22 毋拘隨暗利的人民比隨基納的子提比尼的人較強；提比尼死，暗利就作王。
16:23 猶大王亞撒第三十一年，暗利做以色列王，共十二年；前六年佇得撒作王。
16:24 暗利用七十公斤的銀對撒馬買撒馬利亞山，佇山頂起城；就照彼個山的地主撒馬的名，給所起的城號名叫做撒馬利亞。
16:25 暗利行上主看做歹的事，比以前所有的王閣較歹。
16:26 因為伊行尼八的子耶羅波安的路，互以色列人陷落罪，去拜虛假的神明，激動上主 — 以色列的上帝受氣。
16:27 暗利其他的事蹟，及伊的成就，攏記載佇《以色列列王史》。
16:28 暗利轉去伊的列祖遐了後，安葬佇撒馬利亞；伊的子亞哈續接伊作王。
以色列王亞哈
16:29 猶大王亞撒第三十八年，暗利的子亞哈做以色列王，佇撒馬利亞作王二十二年。
16:30 暗利的子亞哈做上主看做歹的事，比以前所有的王閣較歹。
16:31 伊犯尼八的子耶羅波安的罪，毋拘猶看這做小事；伊閣娶西頓王謁巴力的查某子耶洗碧做某，去服事跪拜巴力。
16:32 伊佇撒馬利亞為著巴力起廟，佇廟內給巴力起祭壇。
16:33 亞哈閣造亞舍拉女神。亞哈的所做激上主 — 以色列的上帝受氣，比以前的以色列列王閣較嚴重。
16:34 亞哈作王的時，伯特利人希伊勒重建耶利哥城；伊下地基的時，死大子亞比蘭，安門扇的時，死煞尾子西割；抵抵照上主通過嫩的子約書亞所講的話。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。