上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
猶大王亞比雅
15:1 ( 代下 13:1-14:1 )
尼八的子以色列王耶羅波安第十八年，亞比雅做猶大王，
15:2 佇耶路撒冷作王三年；伊的老母叫做瑪迦，是押沙龍的查某子。
15:3 亞比雅做伊的老父以前所做一切的罪惡；伊的心無親像伊的阿祖大闢的心完全順服上主 — 伊的上帝。
15:4 毋拘上主 — 伊的上帝因為大闢的緣故，互伊佇耶路撒冷有一葩燈，互伊的子續接伊的位，閣互耶路撒冷堅固。
15:5 大闢佇赫人烏利亞彼件事以外，攏做上主看做好的事，一生無違背上主的命令。
15:6 羅波安及耶羅波安常常交戰。
15:7 亞比雅其他的事蹟，伊所做一切的事攏記載佇《猶大列王史》。亞比雅嘛曾及耶羅波安交戰。
15:8 亞比雅轉去伊的列祖遐，人給伊安葬佇大闢城；伊的子亞撒續接伊作王。
猶大王亞撒
15:9 ( 代下 15:16-16:6 )
以色列王耶羅波安第二十年，亞撒做猶大王。
15:10 伊佇耶路撒冷作王四十一年；伊的阿嬤叫做瑪迦，是押沙龍的查某子。
15:11 亞撒親像伊的祖大闢做上主看做好的事，
15:12 對國內除去孌童，以及伊的祖先所造一切的偶像；
15:13 閣廢除伊的阿嬤瑪迦太后的位，因為瑪迦有造亞舍拉可惡的神像。亞撒將神像剉掉，佇汲淪溪谷放火燒。
15:14 雖然許個山頭壇猶未除去，毋拘亞撒一生完全順服上主。
15:15 伊將伊的老父及伊本身分別作聖的金、銀，及器具，攏帶入上主的聖殿。
15:16 亞撒及以色列王巴沙常常交戰。
15:17 以色列王巴沙來攻擊猶大，修建拉瑪城，欲阻擋人佇猶大王亞撒遐出入。
15:18 亞撒就將上主聖殿及王宮的府庫賰的金銀，攏交互伊的人臣，派𪜶去大馬士革見敘利亞王，希旬的孫，他伯臨門的子便‧哈達，對伊講：
15:19 「咱來結盟，親像你的老父曾及我的老父結盟。今我用金銀做禮物送你，請你廢除你及以色列王巴沙立的約，互伊對猶大撤退。」
15:20 便‧哈達同意亞撒王的話，就派伊的軍長去攻擊以色列的城，攻破以雲、但、亞伯‧伯‧瑪迦、加利利湖附近的地區、拿弗他利地區。
15:21 巴沙聽著此個消息，就停工無閣修建拉瑪，猶原住佇得撒。
15:22 對按呢，亞撒王命令猶大所有的人民，逐個人攏著服從，將巴沙用來欲修建拉瑪的石頭及柴料，搬去重建便雅憫地區的迦巴及米斯巴。
15:23 亞撒其他的事蹟、伊的成就、伊所做的事，及伊所起的城，攏記載佇《猶大列王史》。亞撒年老的時，致著腳的病。
15:24 亞撒轉去伊的列祖遐，及伊的列祖安葬佇大闢城；伊的子約沙法續接伊作王。
以色列王拿答
15:25 猶大王亞撒第二年，耶羅波安的子拿答做以色列王。伊統治以色列兩年。
15:26 拿答做上主看做歹的事，行伊老父的路，及伊的老父仝款互以色列人陷落罪。
15:27 以薩迦支族亞希雅的子巴沙背叛拿答。拿答及以色列軍兵圍困非利士人的基比頓城的時，巴沙給伊刣死。
15:28 猶大王亞撒第三年，巴沙刣死拿答，篡伊的位。
15:29 巴沙一下作王，就刣死耶羅波安全家，將所有會喘氣的攏剿滅，無給耶羅波安留一個；抵抵照上主通過伊的僕人示羅人亞希雅所講的話。
15:30 這是因為耶羅波安有犯罪，閣互以色列人陷落罪；伊按呢做有激動上主 — 以色列的上帝受氣。
15:31 拿答其他的事蹟，及伊所做一切的事，攏記載佇《以色列列王史》。
15:32 亞撒及以色列王巴沙常常交戰。
以色列王巴沙
15:33 猶大王亞撒第三年，亞希雅的子巴沙佇得撒做以色列人民的王二十四年。
15:34 伊做上主看做歹的事，行耶羅波安的路，互所有的以色列人陷落罪。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。