上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
所羅門的人臣
4:1 所羅門王做全以色列的王。
4:2 伊的人臣記佇下面：撒督的子亞撒利雅做祭司；
4:3 示沙兩個子以利何烈及亞希雅做書記；亞希律的子約沙法做史官；
4:4 耶何耶大的子比拿雅做元帥；撒督及亞比亞他做祭司；
4:5 拿單的子亞撒利雅做總督長；拿單的子撒布得做祭司，及王的顧問；
4:6 亞希煞做宮廷總管；押大的子亞多尼蘭做強制勞工的監督。
4:7 所羅門佇以色列全地設立十二個總督，為著王及王的家族備辦食物，每年逐個人供給一個月。
4:8 𪜶的名記佇下面：便‧戶珥佇以法蓮山區；
4:9 便‧底甲佇瑪加斯、沙賓、伯‧示麥、以倫‧伯‧哈南；
4:10 便‧希悉佇亞魯泊，嘛管理梭哥及希弗全地；
4:11 便‧亞比拿達佇多珥的全山地；伊娶所羅門的查某子她法做某；
4:12 亞希律的子巴拿佇他納、米吉多，及倚近撒拉旦、耶斯列下旁的伯‧善全地，對伯‧善到亞伯‧米何拉，到約緬彼旁；
4:13 便‧基別佇基列的拉末城，伊嘛佇基列的瑪拿西子孫睚珥許個城，巴珊的亞珥歌伯地的大城，共六十座城，攏有城牆及銅的門閂；
4:14 易多的子亞希拿達佇瑪哈念；
4:15 亞希瑪斯佇拿弗他利；伊娶所羅門另外一個查某子芭實抹做某；
4:16 戶篩的子巴拿佇亞設及比亞綠；
4:17 帕路亞的子約沙法佇以薩迦；
4:18 以拉的子示每佇便雅憫；
4:19 烏利的子基別佇基列地；就是以前亞摩利王西宏及巴珊王噩的地。
另外有一個總督長管理所有的地區。
所羅門的富強
4:20 猶大及以色列的人口多甲親像海邊的沙；𪜶糧食充足，嘛真快樂。
4:21 所羅門管轄對幼發拉底河到非利士人的地，直到埃及邊界許個國；所羅門在生的日，𪜶攏進貢歸順伊。
4:22 所羅門逐日需要的糧食：幼麵粉五千公升，粗麵粉一萬公升；
4:23 牛椆內飼的肥牛十隻，草埔的牛二十隻，羊一百隻，猶有鹿、羚羊、赤鹿，及肥的禽鳥。
4:24 伊統治幼發拉底河西旁所有地區，就是對提弗薩到迦薩諸個王國；伊所管轄的全地攏享受太平。
4:25 所羅門活啲的日，對但到別是巴的猶大人及以色列人，攏佇𪜶的葡萄樹及無花果樹腳安然徛起。
4:26 所羅門有四萬間拖戰車的馬的馬椆，閣有一萬兩千個馬兵。
4:27 許個總督，逐個照𪜶負責的月分，為著所羅門王及王宮內的人準備食物，連一項都無欠。
4:28 𪜶閣照𪜶的職責，為著戰馬及其他用途的馬運送大麥及草料去需要的所在。
所羅門的智慧
4:29 上帝賞賜所羅門極大的智慧聰明，互伊的理解力親像海邊的沙𣍐量得。
4:30 所羅門的智慧超過所有東方人的智慧及埃及人一切的智慧。
4:31 伊的智慧贏過所有的人，贏過以斯拉人以探，及瑪曷的子希幔、甲各、達大；伊的名聲傳到四圍逐國。
4:32 伊做箴言三千句，詩歌一千空五首。
4:33 伊講論草木，對黎巴嫩的柏香樹到牆仔頂發起來的牛膝草；嘛講論走獸、飛鳥、蟲𧒴、魚類。
4:34 列國的王聽著所羅門王的智慧，就攏派人去聽所羅門智慧的話。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。